“Payoniya” nikimanyisa ogwo orikuza omu mwanya musya kutembuurira abandi. Yesu akaba ari nka payoniya, ahakuba akooherezibwa omu nsi kubuurira n’okutembuurira abantu omuhanda ogurikubabaasisa kutunga amagara agatahwaho. (Matayo 20:28) Omu bunaku obu, abakuratsi be nibamutooreza barikumara obwire bwingi ‘nibahindura abantu abeegi.’ (Matayo 28:19, 20) Abamwe babaasize kuba baapayoniya.

Payoniya n’omubuurizi orikumara obwire bwe bwingi omu kubuurira. Abajurizi ba Yehova boona nibabuurira amakuru marungi. Kwonka, abamwe babaasize kukora entebeekanisa kuheereza nka baapayoniya ab’obutwire, barikubuurira eshaaha 70 buri kwezi. Okubaasa kukora ekyo, baingi nibakora emirimo ey’okwebaisaho etarikubatwarira bwire bwingi. Abamwe nibatooranwa kuheereza nka baapayoniya ab’omutaano omu bicweka ei ababuurizi barikwetengwa munonga. Buri kwezi nibabuurira eshaaha 130 nari n’okukiraho. Baapayoniya nibamarwa na bikye ebi baine, barikumanya ngu Yehova naija kubareeberera. (Matayo 6:31-33; 1 Timoseo 6:6-8) Abo abatarikubaasa kuba baapayoniya ab’omutaano nari ab’obutwire, nibaba baapayoniya abahwezi obu barikuba nibabaasa, barikubuurira eshaaha 30 nari 50 omu kwezi.

Payoniya naahigwa rukundo ei ainiire Ruhanga n’abantu. Nka Yesu, nitureeba ngu abantu baingi nibeetenga kumanya Ruhanga n’ebigyendererwa bye. (Mako 6:34) Kandi twine okumanya okurikubaasa kubahwera hati kugira amatsiko aha biro by’omumaisho. Rukundo ei payoniya arikuba ainiire abataahi neemuhiga kukoresa obwire n’amaani ge kubahwera kumanya amakuru marungi. (Matayo 22:39; 1 Abatesalonika 2:8) Ekyo nikimuhwera kugira okwikiriza kuhami, okwirira haihi Ruhanga n’okutunga okushemererwa.—Ebyakozirwe 20:35.

• Payoniya nikimanyisa ki?

• Niki ekirikuhiga bamwe kuheereza nka baapayoniya?