Mawu yakuti ‘mpainiya’ kazinji-kazinji yachathandawuza munthu yemwe achayamba kufungula gawo panango njira kuti anango apitemo. Tingalewe kuti Yesu wenze mpainiya ndawa adatumiziwa padziko kuti adzalalikire ntontholo wopulumusa moyo, nkufungula njira yokagumanira moyo. (Mateyu 20:28) Ntsiku zino, ateweri wake achatewedzera chitsanzo chake mwa kumbamala nthawe izinji yangakwanise kuti ‘apfunzise wanthu.’ (Mateyu 28:19, 20) Azinji ankuchitambo utumiki moyu wa upainiya.

Mpainiya ni munthu yemwe achalalikira nthawe zose. Mboni za Yahova zose zichalalikira ntontholo wabwino. Ndipomwapa, azinji akonza vinthu pamoyo wawo kuti atumikire ninge apainiya wokhazikika nkumbamala 70 ora mwezi uliwose pa basa yolalikira. Azinji kuti akwanise utumiki moyu, achafaga basa yomwe ingawapase nthawe. Anango achasaluliwa kuti atumikire ninge apainiya wapadera m’madera yomwe yachadekana wolalikira va Ufumu azinji, nkumbalalikira 130 ora panango kuposha. Apainiya achakhala moyo wosafuna vizinji, nkumbathemba Yahova kuti awapase vomwe achada. (Mateyu 6:31-33; 1 Timoteyo 6:6-8) Wale womwe angakwaniselini kuchita upainiya wokhazikika, angatumikire ninge apainiya wothandiza vinthu vikakhala bwino pa moyo achikwanisa kulalikira 30 panango 50 ora pa mwezi uliwose.

Chikondi ndicho chichamuchichimiza mpainiya kukonda Mulungu na wanthu. Ninge mwevenzere na Yesu, chikondi ndicho chichatichitisa kuwona mavuto yomwe wanthu azinji ankugumana nayo. (Maliko 6:34) Isepano tinamalangizo yazinj yomwe yangawathandize manjewuno na kuwapasa chidikhiro chakutsogolo. Kukonda wanthu kuchathandiza mpainiya kumala nthawe na mphanvu zake pa kupfunzisa wanthu kuti adziwe ntontholo wabwino. (Mateyu 22:39; 1 Atesalonika 2:8) Kuchita vimwevi kuchachitisa kuti akhale wakukondwa, akhale na chikhulupiriro chakulimba na na kumufenderera maninge Mulungu. —Machitidwe 20:35.

• Ko imwepo mungati mpainiya ni mbani?

• Ko nchani chinkuchitisa azinji kuchita utumiki wa nthawe zose?