پہل‌کار اوہناں نُوں کہیا جاندا اے جیہڑ‌ے کسے کم وچ پہل کردے نیں یاں دُوجیاں لئی کسے کم دی راہ کھول دے نیں۔‏ یسوع مسیح نُوں وی پہل‌کار آکھیا جا سکدا اے کیونکہ اوہناں نُوں زندگی بخشن والا پیغام سناؤن لئی زمین تے گھلیا گیا سی تے اوہناں نے لوکاں لئی نجات دی راہ کھولی۔‏ (‏متی 20:‏28‏)‏ اَج یسوع مسیح دے پیروکار اوہناں دی مثال تے چلدے نیں تے شاگرد بناؤن دے کم وچ ودھ چڑھ کے حصہ لیندے نیں۔‏ (‏متی 28:‏19،‏ 20‏)‏ ایہناں وچوں کئی جنے پہل‌کاراں دے طور تے خدمت کردے نیں۔‏

پہل‌کار زیادہ توں زیادہ منادی کردے نیں۔‏ سارے یہوواہ دے گواہ بادشاہی دی منادی کردے نیں۔‏ پر کجھ بھین بھراواں نے اپنی زندگی وچ کئی تبدیلیاں کیتیاں نیں تاکہ اوہ پہل‌کار بن کے ہر مہینے 70 گھنٹے منادی کر سکن۔‏ ایہدے لئی کئی پارٹ ٹائم نوکری کردے نیں۔‏ کجھ بھین بھراواں نُوں خصوصی پہل‌کار بنایا جاندا اے۔‏ اوہناں نُوں ایسے علاقیاں وچ گھلیا جاندا اے جِتھے ہور مناداں دی لوڑ ہوندی اے۔‏ اوہ ہر مہینے 130 یاں ایس توں بوہتے گھنٹے منادی کردے نیں۔‏ پہل‌کار خوشی خوشی سادی زندگی گزار دے نیں۔‏ اوہناں نُوں پُورا بھروسا ہوندا اے کہ یہوواہ اوہناں دیاں لوڑاں پُوریاں کرے گا۔‏ (‏متی 6:‏31-‏33؛‏ 1-‏تیمُتھیُس 6:‏6-‏8‏)‏ جیہڑ‌ے بھین بھرا کل‌وقتی پہل‌کار نئیں بن سکدے،‏ اوہ جدوں ہو سکے مددگار پہل‌کار دے طور تے مہینے وچ 30 یاں 50 گھنٹے منادی کردے نیں۔‏

پہل‌کار خدا نُوں تے لوکاں نُوں پیار کردے نیں۔‏ یسوع مسیح وانگوں سانوں وی احساس اے کہ لوکاں نُوں خدا تے اوہدے مقصد بارے جانن دی سخت لوڑ اے۔‏ (‏مرقس 6:‏34‏)‏ اَسی لوکاں دی ایہہ لوڑ کیویں پُوری کر سکنے آں؟‏ اَسی اوہناں نُوں پاک کلام دیاں سچائیاں سکھا سکنے آں جیہڑ‌یاں اَج دے دور وچ اوہناں دے بڑے کم آؤن گیاں۔‏ ایہدے علاوہ اَسی اوہناں نُوں اِک سوہنے مستقبل دی امید دے سکنے آں۔‏ پہل‌کار لوکاں نُوں دلوں پیار کردے نیں۔‏ ایس لئی اوہ خوشخبری سناؤن لئی بڑے شوق نال اپنا وقت تے طاقت استمال کردے نیں۔‏ (‏متی 22:‏39؛‏ 1-‏تھسلُنیکیوں 2:‏8‏)‏ پہل‌کاراں نُوں اپنی محنت دا کیہہ پھل مِلدا اے؟‏ پہل‌کاراں دا ایمان مضبوط ہوندا اے،‏ خدا نال اوہناں دا پیار گُوڑھا ہوندا اے تے اوہناں نُوں ڈھیر ساریاں برکتاں مِلدیاں نیں۔‏—‏اعمال 20:‏35‏۔‏

• پہل‌کار کِنہاں نُوں کہیا جاندا اے؟‏

• کجھ یہوواہ دے گواہ پہل‌کار بنن دا فیصلہ کیوں کردے نیں؟‏