Precursor nisqa simiqa “ñawpariq” ninanmi; ñawpaqta riq runaqa mana piqpa purisqan ñantan kichan qhepata riqkunapaq. Diosmi Jesusta kay Hallp’aman kachamurqan kawsachiq willakuyta willananpaq, qespichiq ñanta kicharinanpaq ima, chaymi payta nikun “precursor” nispa (Mateo 20:28). Ñoqaykupas Jesusta qatikuspan tukuy atisqaykuta kallpachakuyku hukkunaman yachachinaykupaq (Mateo 28:19, 20). Chaymi wakinqa precursor kanku.

Tukuy tiemponkuwan predicanku. Jehová Diospa testigonkunaqa llapallaykun predicayku. Ichaqa wakinmi tiemponkuta allinta allichakuspa precursor regular kanku, paykunaqa sapa killan 70 horata predicanku, chayta hunt’anankupaqtaq wakinqa kuskan p’unchaylla llank’anku. Wakinqa precursor especial kanankupaqmi akllasqa kanku. Paykunaqa predicaqkunaq necesitakusqan llaqtakunamanmi kachasqa kanku, sapa killataq 130 otaq más horata predicanku. Precursorkunaqa imachus necesitasqallankuwanmi kawsanku, Jehová Diospa yanapayninpitaq confianku (Mateo 6:31-33; 1 Timoteo 6:6-8). Precursor regular otaq precursor especial kayta mana atiqkunaqa, precursor auxiliar nisqan kanku, paykunaqa huk killapin 30 otaq 50 horata predicanku.

Diosta runamasinkutawan munakusqankun kallpachan. Jesús hinan ñoqaykupas reparayku askha runakuna Diosmanta yachayta necesitasqankuta (Marcos 6:34). Ñoqaykuqa yachaykun qhepa tiempoman sumaq kawsay kananta, chayta suyakuymi paykunatapas yanapanman. Chaymi precursorkunaqa runamasinkuta munakuspa tukuy kallpankuwan tiemponkuwan ima allin willakuykunata yachachinku (Mateo 22:39; 1 Tesalonicenses 2:8). Chayta ruwaymi yanapan allin iñiyniyoq kanankupaq Dioswan hukllaschasqa kanankupaqpas, chaywantaq kusisqa kanku (Hechos 20:35).

• ¿Iman precursor kay?

• ¿Imaraykun wakin Testigokuna precursor kanku?