Prjekopňikos hino o manuš, ko peršo preskuminel neve thana a phundravel (phuterel) o drom avrenge. Ada kerelas the o Ježiš. O Del bičhaďa le Ježiš pre phuv, hoj peskera službaha avrenge te pomožinel a te phundravel o drom ke zachrana. (Matúš 20:28) Leskere nasledovňika adaďives keren oda, so ov. Hine andre služba, keci ori pes del a keren [kresťanske] učeňiken. (Matuš 28:19, 20 NZ) Varesave služinen sar prjekopňika.

Phirel but ori andre služba. Savore le Jehovaskere svedki zvestinen pal e lačhi sprava. Varesave lendar peske zmeňinde o dživipen, bo sľubinde, hoj sako čhon ena andre služba 70 ori. Vičinas len praviďelna prjekopňika. Buter lendar peske arakhle buťi pro čjastočno uvezkos, kaj len te el buter časos pre služba. Varesave sas kidle avri, kaj te en zvlaštna prjekopňika a te služinen pro thana, kaj nane but zvestovaťeľa. Lengeri buťi hin te el andre služba 130 ori abo buter. O prjekopňika dživen skromňe a paťan, hoj o Jehovas pes pal lende postarinela. (Matúš 6:31-33; 1. Timotejovi 6:6-8) Varesave le Jehovaskere svedki našťi služinen ajci but, ale šaj en pomocna prjekopňika, te sľubinen, hoj jekh abo buter čhona ena andre služba 30 abo 50 ori.

Andre služba les cirdel e laska ko Del the ko manuša. Avka, sar le Ježišoske the amenge hin pharo vaš o manuša, te dikhas, hoj len ňiko na ľidžal ko Del. (Marek 6:34) Amen lenge šaj pomožinas avka, hoj lenge phenaha pal oda, savo šukar dživipen užarel le lačhe manušen. Le prjekopňiken cirdel o jilo te zvestinel le manušenge e lačhi sprava. Rado den peskeri zor the časos lenge. (Matúš 22:39; 1. Tesaloničanom 2:8) Adi buťi pomožinel lenge zorales te paťal le Devles a te el pašeder ke leste. Hin lenge mište pro jilo. (Skutky 20:35)

• Ko hino prjekopňikos?

• Soske vareko kamel te služinel ajci but ori?