Duucha woyite “suwisaancho” yaanno qaali, haaro qooxeessa balaxe mare wolu mannira faro fananno manna kulannoho. Yesuusi iiminni uullara daye mannu oosora heeshsho uyitanno soqqansho soqqaminohuranna mannu gato afiˈranno faro fanino daafira suwisaanchoho yaa dandiinanni. (Maatewoosi 20:28) Xaa yannara harunsaanosi ‘manna rosaano’ assate dandaaminsa deerrinni lowo saate soqqante isi lawishsha harunsitanni no. (Maatewoosi 28:19, 20) Mitu roduuwinke suwisaano ikkite soqqantanni no.

Suwisaanchoho yaa sabbakate looso qara loososi assiˈrinoho. Yihowa Farciˈraasine baalunku dancha duduwo dudubbannoreeti. Ikkirono, mitootu woˈma yanna suwisaano ikkite aganunni 70 saate sabbakate pirogiraamensa biddi assidhino. Batinyu roduuwinke konni garinni soqqamate yite lamalate giddo gama barra calla loosiˈrate higgino. Mitootu qolte sabbakanno manni roore hasiisanno base hadhe baxxitino suwisaano ikkite soqqantanno gede shoomantino; kuri aganu giddo 130 woy hakkiinni saˈanno saate sabbakkanno. Kuri suwisaano Yihowa hasiisannonsa coye wonshannonsata addaxxitanno daafira bikku heeshsho heedhanno. (Maatewoosi 6:31-33; 1 Ximootewosi 6:6-8) Sabbakate looso qara loosonsa assiˈra hoogguri kayinni, dandiitanno woyite kaaˈlaano suwisaano ikkite soqqantanno; kuri aganu giddo 30 woy 50 saate sabbakkanno.

Suwisaano soqqantannohu Maganonna manna baxxanno daafiraati. Yesuusinte gede ninkeno xaa yannara lowo manni ayyaanaamittetenni mageeshsha hudiˈrinoro anfoommo. (Marqoosi 6:34) Mannaho konni kaˈira huluullissannokki hexxo heedhannonsa gede assitannoti, hattono xaara nafa kaaˈlitanno egenno noohu ninkewaati. Suwisaano ollaansa baxxanno daafira insara dancha duduwo kulate yite yannansanna wolqansa shaqqillunni uyitanno. (Maatewoosi 22:39; 1 Teselonqe 2:8) Tenne assitanno daafira, ammanansa jawaattanno, Maganunniwa albinni roore shiqqanno, hattono lowo hagiirre afidhanno.—Soqqamaanote Looso 20:35.

• Suwisaanchoho yaa mayyaate?

• Suwisaano sabbakate looso qara loosonsa assidhanno gede assannonsari maati?