Ashighe kpishi ishember i “pania” la ka i ôr kwagh u or u nan za hii paan gbenda sha u mbagenev ve kar sha mi yô. Yesu lu inja pania ne, sha ci u yange i tindi un shin tar sha u a va er tom u waren ior shi a paa gbenda u uumace vea fatyô u karen sha mi, zuan a myom yô. (Mateu 20:28) Nyian kpa, mbadondon un mba dondon ikyav na la sha u nan shighe ve ken tom u ‘geman ior hingir mbahenen’ la, er ve fetyô cii. (Mateu 28:19, 20) Mbagenev mba eren tom u se yer ser tom pania la.

Pania ka orivangeli u pasen kwagh hanma shighe. Mbashiada mba Yehova cii mba pasen loho u dedoo. Nahan kpa, mbagenev nyôôso akaa a ve eren ken uma ve la sha er vea zua a shighe u eren tom u pania u keke la, vea pasen kwagh ahwa 70 ken hanma uwer yô. Cii man mbagenev kpishi ve er tom pania yô, ka ve pande shighe u ve eren tom u uke la. Mbagenev di yô, ka i tsua ve ér ve er tom u ikpur pania sha ajiir a kwagh a hembe gban sha mba pasen kwagh u Tartor la; ka ve pase kwagh ahwa 130 ken hanma uwer. Upania ka vea lu a akaa kpuaa kpa i kuma ve, sha ci u ve na jighjigh ér Yehova una na ve akaa a a lu hange hange ken uma la. (Mateu 6:31-33; 1 Timoteu 6:6-8) Mba ve kercio u eren tom u pania hanma shighe ga yô, ka ve er tom u ishuen pania, er ve fetyô la, nahan ve seer pasen kwagh ahwa 30 shin 50 ken uwer.

Upania mba pasen kwagh sha ci u Aôndo doo ve ishima kua ior kpaa. Se nenge ser sar ior nyian tsung u fan kwagh u Aôndo man mbaawashima nav, er Yesu kpa nenge nahan. (Marku 6:34) Kpa se mba a mfe u una wase ve hegen, vea lu a ishimaverenkeghen i tenger ga, sha kwagh u mlu ve u ken hemen la yô. Upania soo mbawanndor a ve kpishi, nahan ka ve na shighe ve mgbeghaa sha u pasen mbagenev loho u dedoo sha afatyô ve cii. (Mateu 22:39; 1 Mbatesalonika 2:8) Kwagh ne ka a na yô, jighjigh u pania nan ne Yehova la a seer taver shi nan seer kporom ikyua a Aôndo shi nan zua a msaanyol kpishi kpaa.—Aerenakaa 20:35.

• Ka an nan lu pania?

• Ka nyi ka i mgbegha mbagenev u eren tom u pania hanma shighee?