Өңде йөрейән ве башгалар үчин ёл ачян адама көпленч «пионер» дийилйәр. Иса пыгамбере хем пионер дийсе болар, себәби ол адамлара гутулыш ёлуны ачмак үчин ер йүзүне гелди ве бүтин өмрүни вагыз ишине багш этди (Матта 20:28). Шу гүнлер онуң гөрелдесине эерйән месихчилер «шәгирт» тайярламак ишине көпрәк вагт сарп этмәге җан эдйәрлер (Матта 28:19, 20). Оларың кәбири болса, пионер гуллугына башлады.

Пионерлер — долы вагтлы гуллукчылар. Ехованың Шаятларының әхлиси хош хабары вагыз этмек ишине гатнашярлар. Эмма оларың кәбири пионер болуп гуллук эдйәрлер. Олар хер ай 70 сагат вагыз эдип билер ялы, ярым гүн ишлейәрлер. Кәбир вагызчылар болса, йөрите пионер гуллугына белленилйәр. Олар вагызчыларың етмейән ерлеринде гуллук эдйәрлер ве вагыз ишине хер ай 130 сагат я-да ондан хем көпрәк вагт сарп эдйәрлер. Пионерлер сада яшаярлар ве яшайыш үчин герекли зады Ехованың үпҗүн этҗекдигине ынанярлар (Матта 6:31—33; 1 Тимотеос 6:6—8). Эмма долы вагтлы гуллук эдип билмейән вагызчылар көмекчи пионер болуп, айда 30 я-да 50 сагат вагыз эдйәрлер.

Пионерлер Худая ве адамлара болан сөйгүсини гөркезйәрлер. Иса ялы биз хем адамларың рухы тайдан гөзгыны ягдайдадыгыны гөрйәрис (Маркус 6:34). Шол себәпли биз адамлара шу гүнлер ве гелеҗекде багтлы яшамага көмек эдйән билими берйәрис. Пионерлер адамлара рухы тайдан көмек этмек үчин вагтыны ве гүйҗүни гайгырмаярлар. Муны этмәге олары адамлара болан сөйги хөвеслендирйәр (Матта 22:39; 1 Селаниклилер 2:8). Бу гуллук оларың иманыны беркидйәр, Худая хас-да якынлашдыряр ве көп шатлык тапмага ярдам эдйәр (Ресулларың ишлери 20:35).

• Пионер дийип киме айдыляр?

• Кәбир вагызчылары долы вагтлы гуллук этмәге нәме хөвеслендирйәр?