Ko te fakakupuga “paeonia” e mahani oi fakatatau ki he tino e hakili fenua fou ma tatala atu te auala mo iē tahi ke mulimuli atu ki ei. Ko Iehu nae vē ko he paeonia, auā na uga mai ia ki te lalolagi ke galue tautua fakahaoola ma tatala mai te avanoa mo te olataga. (Mataio 20:28) I nā aho nei, e mulimuli atu ona hoko ki a te ia e ala i te fakafano o te taimi i te ‘fai o ni hoko.’ (Mataio 28:​19, 20) Ko iē tahi kua mafai oi fai he latou vaega i te mea e takua e ki matou ko te kaukaunaga fakapaeonia.

Te paeonia ko he tino tālaki fakataimi kātoa. E kavea Molimau a Ieova uma ma tino tālaki o te tala lelei. Kae ui i te ia, ko iē tahi kua fakamaopoopo o latou olaga ke kaukauna atu ma paeonia tūmau, e fakafano te 70 itula i nā mahina takitahi i te galuega tālaki. Ke fai tēnei mea, ko te tokalahiga o ki latou e taigole te taimi e galulue ai mo he totogi. Ko iē tahi e filifili ke kaukauna atu ko ni paeonia fakapito i nā kogāmea e manakomia lahi ai ni tino ke folafola atu te Mālō, ma tuku atu te 130 itula pe hili atu ki te tālakiga i nā mahina takitahi. E lotomalilie nā paeonia ke ola i he olaga maulalo, e mautinoa ka fōki mai e Ieova nā mea tāua mo o latou olaga. (Mataio 6:​31-​33; 1 Timoteo 6:​6-8) Mo ki latou e hē mafai oi paeonia fakataimi kātoa hōvē e mafai oi kaukauna ki latou ma paeonia lagolago kāfai e mafai, ma fakatupu ake te latou galuega tālaki ki te 30 pe ko 50 itula i he mahina.

E fakagaeke te paeonia e te alofa ki te Atua ma iē tahi tino. E vē ko Iehu, e mātau e ki matou te tulaga matuā kino lele fakateagaga te i ei te tokalahiga i nā aho nei. (Maleko 6:​34) Kae e i te ki matou te poto e mafai oi fehoahoani atu ki te ki latou i te taimi nei, e fōki atu ki a te ki latou te fakamoemoe malohi mo te lumanaki. E fakaloto malohi ma fiafia he paeonia i te alofa ki nā tuakoi i te tuku atu o tona taimi ma te malohi ke fehoahoani fakateagaga atu ki iē tahi. (Mataio 22:39; 1 Tehalonia 2:8) E fakaiku, i te fakamalohi o tana fakatuatua, e fakatafapili ia ki te Atua, ma maua ai te fiafia lahi.​—Galuega 20:35.

• E fakamatala vehea e koe he tino paeonia?

• He ā te mafuaga e fakaloto malohi ai iē tahi ke paeonia fakataimi kātoa?