Ibbala lyakuti “payona” ciindi ciingi lyaamba bantu bajula ndawu mpya alimwi akusiya nzila kuti bamwi bayitobelezye. Jesu wakali payona wakatumidwe anyika kuti azoocite mulimu uupa buumi akujula nzila yalufutuko. (Matayo 20:28) Mazuba aano batobeli bakwe baliikumwiiya kwiinda mukubeleka ciindi cilamfu kuti bantu ‘babe basikwiya.’ (Matayo 28:19, 20) Bamwi balakonzya kutola ncitwaamba kuti mulimu wabupayona.

Payona mukambawusi waciindi coonse. Bakamboni baJehova boonse mbaasikupupulula makani mabotu. Alubo bamwi bakalipeda mubuumi bwabo kuti babe mapayona aaciindi coonse, kabakambawuka ma-awa asika ku70 amweezi. Kuti bakonzye kucita oobo, biingi babo bakacesya ciindi cakubeleka milimu yabo yakunyama. Bamwi balasalwa kuti babeleke kabali mapayona aayandikana mundawo zibulide bakambawusi baBwaami, kabasisya ma-awa asika ku130 amweezi. Mapayona balakutambula kupona buumi buuba-uba kabalaa kasimpe kakuti Jehova ulabapa nzibayanda mubuumi. (Matayo 6:31-33; 1 Timoteo 6:6-8) Aabo batakonzyi kubeleka mbuli mapayona aaciindi coonse, balakonzya kubeleka kabali mapayona aakugwasilizya mbuli mbubakonzya kuyungizya mulimu wabo wakukambawuka kabasisya ma-awa asika ku30 naa ku50 amweezi.

Payona usungwaazigwaa luyando ndwalaalo kuli Leza akubantu. Mbuli Jesu, andiswe twakabona kuti bantu biingi balaaciyandisyo cakuziba atala aLeza alimwi amakanze aakwe. (Marko 6:34)Pesi tulaa luzibo lunga lulabagwasya lino, kubapa bulangilizi bwakunembo. Luyando ndwalalo payona kuli basimayakilane lumusungwaazya kupa ciindi cakwe anguzu kuti abagwasye kuziba makani mabotu. (Matayo 22:39; 1 baTesalonika 2:8) Mukucita oobo, lusyomo lwakwe lulasimisigwa, uswena afwiifwi aLeza mpawo akujana kubotelwa.—Incito 20:35.

• Payona nga ulamupandulula kuti ngwani?

• Niinzi cisungwaazya bamwi kuba mapayona aciindi coonse?