Ekigambo “payoniya” kikozesebwa ha muntu ayebembera abandi omu kicweka ekihyaka n’abakorra omuhanda. Yesu akaba nka payoniya habw’omulimo ogw’okutebeza ogu y’akozere n’okukingurraho abantu omuhanda ogurukuhikya ha kujunwa. (Matayo 20:28) Na hati, abegeswa be bahondera ekyokurorraho kye nibakozesa obwire bwabu oburukukira obwingi kufoora abantu abandi abegeswa. (Matayo 28:19, 20) Abamu basoboire kukora nka bapayoniya.

Payoniya aba mutebezi w’akasumi koona. Abakaiso ba Yahwe boona batebezi b’amakuru amarungi. Baitu harumu abamu abakozere entekaniza kuhereza nka bapayoniya ab’akasumi koona, banu nibamara esaha 70 nibatebeza buli kwezi. Kusobora kuhikiriza esaha ezo, baingi batunga emirimo nambere batarukunihirwa kukora ekiro kyoona rundi wiiki yoona. Abandi bakomwa kuhereza nka bapayoni abembaganiza, nibasindikwa omu biikaro nambere barukwetaaga muno abatebezi b’Obukama. Banu bamara esaha 130 n’okukiraho nibatebeza buli kwezi. Bamarwa ebintu ebitaito ebibaba baine nibakigumya ngu Yahwe aija kubahikyaho ebi barukwetaaga. (Matayo 6:31-33; 1 Timoseo 6:6-8) Abo abatarukusobora kuhereza nka bapayoniya ab’akasumi koona, basobora kuhereza nka bapayoniya abakonyezi buli obubaba basoboire, nibatebeza esaha 30 rundi 50 buli kwezi.

Okugonza Ruhanga n’abantu nikyo kibaletera kuhereza nka bapayoniya. Nka Yesu, naitwe nitukirora ngu abantu baingi nibetaaga kumanya Ruhanga n’ebigendererwa bye. (Marako 6:34) Itwe twiina okumanya okurukusobora kubakonyera hati, okubahereza okunihira okugumire okw’obusumi obw’omu maiso. Habwokuba bapayoniya bagonza abantu, kinu kibaletera kuhayo obwire n’amaani gaabu kubakonyera kumanya amakuru amarungi. (Matayo 22:39; 1 Abasesalonika 2:8) N’ekirugamu okwikiriza kwabu n’enkoragana yaabu na Ruhanga byeyongera kuguma, kandi nabo beyongera kusemererwa.—Engeso 20:35.

• Payoniya nuwe oha?

• Kiki ekiretera abantu abamu kuhereza nka bapayoniya ab’akasumi koona?