Эгелекчилер — чаа девискээрлерни болгаш оруктарны ажыдар улус-тур. Ол талазы-биле Иисусту база эгелекчи деп адап болур, чүге дизе ол улуска бараан болуп, камгалалче орукту ажыдар дээш, черже келген (Матфей 20:28). Ооң үлегерин эдерип, Иегованың Херечилери өөреникчилер белеткээр ажылче хөй үезин үндүрүп турар (Матфей 28:19, 20). Оларның чамдыызы эгелекчилер кылдыр бараалгап турар.

Эгелекчи — Бурганга долу үези-биле бараалгап турар кижи-дир. Иегованың Херечилериниң шуптузу болдунар шаа-биле буянныг медээни суртаалдап турар. Ынчалза-даа оларның чамдыызы, айда 70 шак иштинде суртаалдаар дээш, чуртталгазын аайлап алган. Ындыг бараалгакчыларны доктаамал эгелекчилер деп адаар. Эгелекчи кылдыр бараалгаар дээш, оларның хөй кезии чартык хүн ишти ажылдап турар. А чамдык эгелекчилер хереглели улуг девискээрлерде тускай эгелекчилер бооп бараалгап турар. Ай санында ындыг бараалгакчылар 130 шак азы оон-даа хөйнү суртаалдап турар. Эгелекчилер бөдүүн кылдыр чурттап турар. Иегова оларны кагбас база амыдыралга херектиг бүгү чүвени бээр дээрзинге олар ыяк бүзүреп турар (Матфей 6:31—33; 1 Тимофейге 6:6—8). А кым суртаалче үезин долузу-биле үндүрүп шыдавас болза, олар дузаламчы эгелекчилер бооп, айда 30 азы 50 шак иштинде суртаалдап болур.

Эгелекчилерни Бурганга болгаш кижилерге ынакшылы башкарып чоруур. Иисус дег, бис база улустуң сагыш-сеткилиниң хоозургай байдалын эскерип турар бис (Марк 6:34). Ынчалза-даа келир үе дугайында бүзүрелдиг идегеливис-биле үлежир болзувусса, оларга дузалап болур бис. Ынчангаш эгелекчилер күжүн болгаш үезин харамнанмайн, кижилерге Бурган-биле эптежип алырынга дузалап турар, чүге дээрге ону кылырынче оларны ынакшыл оттуруп турар (Матфей 22:39; 1 Фессалоникчилерге 2:8). Ынчаар бараалгап тургаш, эгелекчи бодунуң бүзүрелин быжыктырып, Иеговага оон-даа артык чоокшулап, аажок улуг өөрүшкүнү миннип турар (Ажыл-чорудулга 20:35).

• Эгелекчи дээрге кымыл? Тайылбырлап көрүңерем.

• Бурганга долузу-биле бараалгаарынче чамдык улусту чүү оттуруп турарыл?