“Ọkobaro,” ọyen ohwo rọ gbẹn idjerhe vwọkẹ ihwoefa. A sa tanẹ Jesu ọkobaro, kidie e jiro rhe akpọ na rhi ruiruo rẹ aghwoghwo na, rere ihwo buebun se vwo vwo usivwin. (Matiu 20:28) Nonẹna, idibo rọyen vwẹrokere, ayen ghwọrọ inọke buebun vwo “yono ihwo.” (Matiu 28:19, 20) Evo ga kerẹ ekobaro.

Ọkobaro, ọyen oghwoghwota ọkieje. Iseri ri Jihova eje ghwoghwo iyẹnrẹn esiri na. Ẹkẹvuọvo, evo rhuẹrẹ ọke rayen phiyọ rere ayen sa vwọ ga kerẹ ekobaro ọkieje, ayen ghwọrọ inọke 70 kemeranvwe kemeranvwe vwo ruiruo aghwoghwo na. Buebun rayen wiowian rẹ ubrọke, ayen se vwo ru ọnana. A vwẹ evo vwo mu kerẹ ekobaro oghẹresan vwẹ asan ra da ma guọnọ ukẹcha, enana ghwọrọ inọke 130 vwo ghwoghwo ota kemeranvwe kemeranvwe. Ekobaro na vwo ẹwẹn rẹ otekẹvwẹ, ayen vwo imuẹro nẹ Jihova cha kẹ ayen oborẹ ayen guọnọre vwẹ akpeyeren. (Matiu 6:31-33; 1 Timoti 6:6-8) Ohwo rọ sa dia ọkobaro oghẹresan yẹrẹ ọrẹ ọkieje-e, sa ghwọrọ inọke 30 yẹrẹ 50 vwọ ga kerẹ ọkobaro rẹ ubrọke.

Ẹguọnọ rẹ Ọghẹnẹ kugbe ihworakpọ yin mu ohwo vwọ dia ọkobaro. Kerẹ Jesu, avwanre niroso nẹ ihwo buebun guọnọ riẹn Ọghẹnẹ kugbe ọhọre rọyen. (Mak 6:34) Avwanre vwo erianriẹn rọ sa chọn ayen uko vwo vwo uvi iphiẹrophiyọ kpahen obaro na. Ẹguọnọ rẹ ọkobaro vwo kpahen ihworakpọ yen nẹrhẹ ọ reyọ ọke vẹ ogangan rọyen vwo ghwoghwo ikun esiri na kẹ ihwo. (Matiu 22:39; 1 Tẹsalonaika 2:8) Ọnana bọn esegbuyota rọyen gan, o sio kẹrẹ Ọghẹnẹ, ọ je nẹrhẹ oma vwerhọn.​—Iruo 20:35.

• Ono yen ọkobaro?

• Die yin mu ihwoevo vwọ dia ekobaro oghẹresan yẹrẹ erẹ ọkieje?