Kanzhi ipfi “muvulanḓila” ḽi ambela kha vhane vha ya fhethu huswa nahone vha vula nḓila u itela uri vhaṅwe vha vha tevhele. Yesu o vha a tshi nga muvulanḓila, o rumelwa kha ḽifhasi uri a ite vhuḓinḓa vhu tshidzaho na u ṋea vhathu tshibuli tsha uri vha tshidzwe. (Mateo 20:28) Ṋamusi, vhatevheli vhawe vha khou mu edzisa nga u fhedza tshifhinga tshinzhi nga hune vha nga kona ngaho vha tshi khou ita “vhafunziwa.” (Mateo 28:19, 20) Vhaṅwe vho kona u dzhenela zwine ra zwi vhidza tshumelo ya vhuvulanḓila.

Muvulanḓila ndi muevangeli wa tshifhinga tsho ḓalaho. Vhoṱhe vhane vha vha Ṱhanzi dza Yehova ndi vhahuweleli vha mafhungo maḓifha. Naho zwo ralo, vhaṅwe vho dzudzanya vhutshilo havho u itela uri vha vhe vhavulanḓila vha tshifhinga tshoṱhe, vhane vha fhedza awara dza 70 ṅwedzi muṅwe na muṅwe vha tshi khou huwelela. Zwenezwi vha zwi kona nga u dzudzanya uri vha si shume maḓuvha oṱhe mushumoni wavho wa u ḓitshidza. Vhaṅwe vha khethiwa uri vha vhe vhavulanḓila vho khetheaho fhethu hune ha vha na ṱhoḓea khulwane ya vhahuweleli vha Muvhuso, vha fhedza awara dza 130 kana u fhira vhe vhuḓinḓani ṅwedzi muṅwe na muṅwe. Vhavulanḓila vha a fushea nga u tshila vhutshilo ho linganyiselwaho, vha tshi fulufhela uri Yehova u ḓo vha ṋea zwishaiwa zwa vhutshilo. (Mateo 6:31-33; 1 Timotheo 6:6-8) Vha sa koni u vha vhavulanḓila vha tshifhinga tsho ḓalaho vha ṅwalisela u vha vhavulanḓila vha u thusa musi zwiimo zwi tshi vha tendela, vha engedza mushumo wavho wa u huwelela nga awara dza 30 kana 50 nga ṅwedzi.

Muvulanḓila u ṱuṱuwedzwa nga u funa Mudzimu na vhathu. U fana na Yesu, ri vhona vhuimo vhu ṱungufhadzaho vhune vhathu vhanzhi vha ḓiwana vhe khaho ṋamusi. (Marko 6:34) Fhedzi ri na nḓivho ine ya nga vha thusa zwino, ya vha ṋea fulufhelo ḽo khwaṱhaho ḽa vhumatshelo. U funa vhathu zwi ṱuṱuwedza muvulanḓila uri a ṋeele nga mafunda tshifhinga tshawe na nungo dzawe u itela u thusa vhaṅwe nga lwa muya. (Mateo 22:39; 1 Vha-Thesalonika 2:8) Nga ṅwambo wa zwenezwo, lutendo lwawe lu a khwaṱhiswa, u sendela tsini na Mudzimu nahone u vha na dakalo ḽihulu.—Mishumo 20:35.

• Ni nga ṱalusa hani ipfi ḽine ḽa ri muvulanḓila?

• Ndi mini zwine zwa ṱuṱuwedza vhaṅwe uri vha dzhenele vhuvulanḓila ha tshifhinga tsho ḓalaho?