„პიონერი“ რენია თქუანა თიცალ კოჩიშე, ნამუთ ცხოვრებაშ შხვადოშხვა სფეროს შხვეფს უკვალუნს შარას. იესო მართალო მუშ საქმეშ პიონერ რდუ, მუშენდა თე ქიანაშა მორთუ, იქადაგუ დო თეშნერო შარა გოუკვალ კაცობრიობას გინასკილადარო (მათე 20:28). ამდღა თიშ მიმაჸუნალეფი გეჸუნა თიშ შარას დო მოწაფეეფიშ მომზადებაშ საქმეს მუთ შილებე ბრელ დროს უთმენა (მათე 28:19, 20). ნამთინეს შეულებ იმსახურას თი სფეროს, ნამუსით პიონერულ მსახურებას უძახუთ.

პიონერი სრულ დროთ მაქადაგებელ რე. იეჰოვაშ თითოულ მოწმე სახიოლო ამბეშ მაუწყებელ რე. ნამთინეს თეშ აფუ ენწყილ მუშ ცხოვრება, ნამდა შეულებ პიონერო იმსახუნას დო ირ თუთას 70 საათი იქადაგას. პიონერობაქ ქეშიალებუანი თიშენ, თე მაუწყებელეფშე ბრელ გვერდ დღას მუშენს. შხვეფს სპეციალურ პიონერო უტენა თექ, სოდეთ სამეფოშ მაქადაგებელეფ რენა საჭირო დო თუთას 130 საათის ვარდა უმოსის ხოლო ქადაგენა. პიონერეფი ჭიჭე მუდგარენს გეჯერდუნა დო ჯერა, ნამდა იეჰოვა მუთ აუცილებერო ოსაჭირუნა თის ქიმეჩანს თინეფს (მათე 6:31—33; 1 ტიმოთე 6:6—8). მიდგას სრულ დროთ მსახურება ვეშულებუნ თინეფ დამხმარე პიონერეფო მსახურენა დო თუთას 30 ვარდა 50 საათის ქადაგენა.

პიონერეფს ღორონთი დო მოყვასი უჸორა თიშენ ქადაგენა. იესოშნერო ჩქი ხოლო ვორწყეთ, ნამდა ამდღა ხალხი სულიერო შქირენულ რე (მარკოზი 6:34). მარა ჩქი მიჩქუნა თიცალ ამბე, ნამუთ ამდღა მოუჰამუანს ხალხის დო მომავალიშ ნამდვილ იმენდის არზენს. პიონერეფს მოყვასი უჸორან თიშენ შხვეფიშ სულიერო მიოხვარებელო დრო დო ენერგია ვაზოგუნა (მათე 22:39; 1 თესალონიკელები 2:8). შედეგო თინეფიშ რწმენა იმანგარებუ დო დიდ ხიოლს გინაფლენა (საქმეები 20:35).

• მი რენა პიონერეფი?

• მუშენ ქადაგენს ნამთინე სრულ დროთ პიონერო?