Diidxaʼ precursor riquiiñeʼ ni para guzeetecabe de ti binni ni ziguxheleʼ ti neza para ganda tiidiʼ xcaadxi binni. Zanda guininu guca Jesús ti precursor, purtiʼ biseendaʼ Dios laabe lu Guidxilayú para gucheechebe diidxaʼ ni rudii guendanabani ne zacá bixhélebe ti neza para guilá binni (Mateo 20:28). Laadu laaca zinándadu ejemplu stibe ca dxi riʼ, purtiʼ riquiiñedu tiempu stidu para gacanedu binni gaca xpinni Cristu (Mateo 28:19, 20). Nuu caadxi de laadu maʼ nácacaʼ cani runibiaʼdu casi precursor.

Ti binni ni riquiiñeʼ stale tiempu stiʼ para gucheecheʼ diidxaʼ. Guiráʼ ca testigu stiʼ Jiobá rucheechedu ca diidxaʼ nacubi ne galán stiʼ Reinu. Peru nuu tu laa maʼ gudixhe chaahuiʼ tiempu stiʼ para ganda gaca precursor regular ne gucheeche diidxaʼ setenta hora guiráʼ beeu. Ne para ganda gúnicabe ni galaa dxi si rúnicabe dxiiñaʼ. Laaca nuu xcaadxi xpinni Cristu ribícabe laacaʼ para gácacaʼ precursor especial ne ruseendacabe laacaʼ lugar ra jma caquiiñeʼ tu gucheeche diidxaʼ. Laacabe rucheechecabe diidxaʼ ti gayuaa treinta hora cada beeu o nuu tiru rúnicabe jma. Ca precursor riʼ qué ruyúbicaʼ gápacaʼ stale cosa risaca ne runi crecaʼ dxandíʼ zacané Jiobá laacaʼ gápacaʼ ni tidinecaʼ dxi (Mateo 6:31-33; 1 Timoteo 6:6-8). Cani qué zanda gaca precursor regular o especial la? zanda gácacaʼ precursor auxiliar, ni rucheeche diidxaʼ treinta o cincuenta hora lu ti beeu.

Rácacabe precursor purtiʼ nadxiicabe Dios ne nadxiicabe binni. Cásica Jesús, laadu laaca rudiʼdu cuenta pabiáʼ caquiiñeʼ guiziidiʼ binni de Dios (Marcos 6:34). Peru ni maʼ bizíʼdidu de lu Biblia zanda gacaneni binni yanna, purtiʼ rusíʼdidu binni zedandá dxi guibánicaʼ jma galán. Ca precursor ca riquiiñecaʼ tiempu ne stipa sticaʼ para gusiidicaʼ xcaadxi binni de Dios purtiʼ dxandíʼ nadxiicabe laacaʼ (Mateo 22:39; 1 Tesalonicenses 2:8). Ni rúnicabe riʼ ruquídxini fe stícabe, riuucabe jma gaxha de Dios ne pur nga nabé riuucabe nayecheʼ (Hechos 20:35).

• Tuu nga ti precursor.

• Xi rucaa caadxi de ca xpinni Cristu iquiiñecaʼ tiempu sticaʼ para gucheechecaʼ diidxaʼ.