Diitz ni dixtil raniʼ buñ precursor rarexani, buñ ni raxal néz toib lagary ro diti noʼ chú ma goyoʼ par que stipnés guicanal láabu. Labúu guinino que Jesús gócbu toib ni raxal néz, portín bieedbu ló Gudxlio par bisuidybu ximod labúu guilaa buñ né bixalbu néz par labúu guibany buñ tipzó (Mateo 20:28). Ló naareʼ racanaldo mod ni bisiambu né raquiindo tiemp ni napdo par guisuidydo buñ (Mateo 28:19, 20). Láaca noʼ herman radxiin rac ni raxal néz.

Toib ni raxal néz ngú ni guirá ór raniʼ xtiitz Dios. Guirá testigos xtuny Jehová raninébu buñ diitz sacró. Per noʼ ni ma gurú né buny xpensary gac ni raxal néz né gony setent ór guirá beʼo par guiniʼ diitz sacró. Par labúu gonyibu ndeʼ rayopyibu dxiin ni guiduidy lagary gacyibu buñ ni raxal néz. Noʼ stipnés ni radxiin rac ni raxal néz guirá ór ni rony 130 ór o más guirá beʼo né rieyibu lagary ro raquiin más herman par guiniʼ de Gobierno xtuny Dios. Buñ ni radxiin rac toib ni raxal néz rioʼ conforma né ni radudy dzú, né nap confianz que Jehová gacné láabu (Mateo 6:31-33; 1 Timoteo 6:6-8). Ni diti labúu radxiin rac ni raxal néz o ni raxal néz guirá ór, labúu radxiin rac ni racné a ni raxal néz layibu ronyibu treint o cincuent ór ló beʼo.

Ni raxal néz rony dxiinreʼ portín nadxiʼ Jehová né nadxiʼ saʼ. Xomod Jesús, raduidydo cuent que buñ diti rimbu Jehová né ni láabu gonybu (Marcos 6:34). Per lóodo napdo galnann xtuny Dios ni labúu gacné layibu ló naareʼ par gapyibu confianz ni gony Dios ló dzú ni sietra. Ni raxal néz nadxiʼ buñ por ngú rabébu tiemp, fuers né galnadip par guisienbu buñ ni ná Dios (Mateo 22:39; 1 Tesalonicenses 2:8). Ndeʼ rony nadip fe xtunyibu né rabigaxyibu Jehová, por ngú rioʼyibu goxtiguie (Hechos 20:35).

• ¿Xí láani ngú toib ni raxal néz?

• ¿Xí láani rachiin a stipnés par guidxin gac buñ ni raxal néz?