Saa yellun diya, Gusunɔ Sinawɔrukoon sɔ̃ɔsinun keu ya sãa yĩre te ta ra Yehofan Seeda Diobu wunanɛ. Ba keu sɔ̃ɔsinu ganu yi, be ba ben saa gira dendimɔ Bandun labaari gean kparabun sɔ̃. Keu sɔ̃ɔsi ni, nu ra be somi bu ka ‘ben sɔma yibia mam mam.’—2 Timɔte 4:5.

Swaa gbiiyobun Keu. Sanam mɛ swaa gbiiyo kiri kiri u wɔ̃ɔ tia kua win waasu sɔɔ, ba ra wi soku u na u keu ko, sɔ̃ɔ nɔbaa tia bɛsɛn Bandun yee garu sɔɔ te ta kun ka wi toma. Keu ye, ya koo wi somi u ka Yehofa susi u sosi, kpa u ka maa dam sosi win waasu kobun swɛɛ baayire sɔɔ, kpa u win sɔmburu wuswaa daasia ka naanɛ.

Gusunɔn Bandun garin waasu kowobun Keu. Swaa gbiiyo be ba yɛ̃ru mɔ, bera ba ra keu ye ko suru yiru, ba maa kpeere bu ben bera deri, kpa bu da mi ba be gɔra kpuro mi bukata ya wãa. N sãa nge ben baawure u nɛɛ: “nɛ wee, a man gɔrio;” ba ka waasu kowo boko win bweseru tem kun maa waare saarimɔ, Yesu Kirisi. (Esai 6:8; Yohanu 7:29) Ma n daa na ba wuu swɛnya, ya koo kpĩ yu bikia bu ben wãaru dibu kawa. Tɔmbun deema, yam susuru, wooru ǹ kun mɛ dĩanu koo kpĩ nu n wunanɛ ka nin dɔɔnɛ ba mɔ. Ya koo gasɔ bikia bu barum kpam mɛɛri. Keu ye, ya koo tantanɔ tɔn durɔbu ka tɔn kurɔbu ka maa kurɔ ka durɔ be ba wãa wɔ̃ɔ 23 ka 65 n baa sɔɔ somi, bu ka daa geenu yewe ben bɔrɔnu ka Gusunɔ sɔɔ. Keu ye, ya koo ra maa be somi bu ka ben sɔmburu wuswaa daasia, kpa Yehofa u ka be loo ko mam mam mi n weenɛ win yigbɛru sɔɔ.

Watchtowern Bibelin Keu ye ba mɔ̀ Galadi. Ka Heberum, “Galadi” ya tubusiawa “kpee sube te ta ra seeda di.” Saa min di ba Galadin keu swĩi, 1943 ɔ, kĩnasibu nge 8 000 n sakawa ba ye kua, yen tɔn dabina ba mɔrisia baama kpuro bu ka seeda di “handunian goonu nnɛ kpuro sɔɔ;” sa maa yen wɛ̃ɛ nɔɔ geesu wa. (Gɔrobun kookoosu 13:47) Su weenasia sua, sanam mɛ be ba yara keu yen di, ba tura tem mɛ ba mɔ̀ Pérou ɔ, baa yigbɛ teeru sari mi. Adama, gisɔ, yigbɛ ni nu wãa mi nu 1 000 tura. Sanam mɛ be ba mɔrisia Japon n temɔ ba sɔmburu torua, Seeda Dio be ba wãa mi piikowa ba ka wɔkuru kera. Tɛ̃, ba 200 000 kere. Suru nɔɔbun keu Galadiɔ, ba ra Gusunɔn Garin keu dukiasie. Be ba sãa swaa gbiiyo gɔrobu ǹ kun mɛ be ba waasun sɔmburu mɔ̀ tem gam nge gɔrobu, ka be ba wee saa bɛsɛn gbãakɔkɔban di, ǹ kun maa mɛ be ba bɛsɛn yigbɛnu beramɔ, bera ba ra soku keu ye sɔɔ, bu ka ben yɛ̃ru dukiasia, bu ka dam wa kpa ba n ka tãsa handunia giran waasun sɔmburu sɔɔ.

• Mban sɔ̃na ba Swaa gbiiyobun Keu swĩi?

• Berà ba koo kpĩ bu Gusunɔn Bandun garin waasu kowobun Keu da?