Ɲanmiɛn i su like suanlɛ’n ti Zoova i Lalofuɛ’m be nzuɛn. I ti’n, be kpɛli suklu wie’m be ba naan be nga be di Ɲanmiɛn Sielɛ’n i jasin fɛ bolɛ junman blɛ kwlaa nun’n, b’a kwla di ‘junman nga Nyanmiɛn fa wlali be sa nun’n, b’a guɛguɛ i bo.’​—2 Timote 4:5

Atin bofuɛ’m be suklu. Ɔ ti atin bofuɛ nga b’a di afuɛ nuan kun atin bolɛ junman nun’n be liɛ. Ɔ di cɛn ba nsiɛn. Be kwla yo i Ɲanmiɛn Sielɛ Sua kun m’ɔ mantan be lɛ’n i nun. Be kpɛli suklu sɔ’n i ba naan ɔ uka atin bofuɛ mun naan be fa be wun be mantan Zoova kpa. Yɛ ɔ uka be naan be sa tɔ jasin fɛ bolɛ’n nun kpa, kpɛkun naan be kwla di be junman’n be ɔ be ɲrun titi.

Ɲanmiɛn Sielɛ’n i jasin bofuɛ’m be suklu. Suklu sɔ’n di anglo nɲɔn. Ɔ ti atin bofuɛ nga be sa w’a tɔ jasin fɛ bolɛ’n nun kpa mɔ be kwla jaso be tranwlɛ’n nun be kɔ lika nga be le jasin bofuɛ awuliɛ lɔ’n be liɛ. I lɛ’n nun’n ɔ ti kɛ be su se kɛ: “Min-ɔn, sunman min” sa. Be sɔnnzɔn Zezi Klist m’ɔ yoli jasin fɛ bofuɛ Danfuɛ’n asiɛ’n su’n. (Ezai 6:8; Zan 7:29) Kɛ be ko tran lika mmua’n, wie liɛ’n ɔ fata kɛ be kaci be ninnge yolɛ wafa’n. Afin ɔ ju wie’n, lika uflɛ sɔ’m be nun’n, wafa nga sran’m be fa yo ninnge mun’n, ɔ nin wafa nga lika’n ti’n, ɔ nin lɔ aliɛ’n be ti be liɛ ngunmin. Ɔ ju wie bɔbɔ’n ɔ fata kɛ be suan aniɛn uflɛ kanlɛ. Be nga be le afuɛ 23 m’ɔ́ fá jú 65, kannzɛ be o aja nun o, be kwla di suklu sɔ’n wie. Suklu sɔ’n yo maan be kwla yi Ɲanmiɛn i nzuɛn nga ɔ́ úka be be junman’n i dilɛ’n nun’n be nglo. Yɛ ɔ yo maan Zoova nin i anuannzɛ’n be kwla fa be di junman kpa.

Gileadi suklu. Ebre nun’n, “Gileadi” i bo’n yɛle ‘Yɛbuɛ kwle nga ɔ ti sran nɲɔn be afiɛn lalofuɛ’n.’ Kɛ be kpɛli Gileadi suklu’n i ba afuɛ nga be flɛ i 1943 nun lele andɛ’n, aniaan 8.000 tra su b’a di suklu sɔ’n. Kpɛkun be sunmannin be kɛ ngaliɛ difuɛ mun sa naan be ko bo jasin fɛ’n i kpa “lele fa ju asiɛ’n i awieliɛ.” Be junman’n bali nvlɛ kpa. (Sa nga be yoli’n 13:47) Kpalɛ klikli nga ngaliɛ difuɛ’m bé jú Peru lɔ’n, nn Zoova i Lalofuɛ’m be asɔnun ba kun sa nunman lɔ. Sanngɛ dɔ nga su’n be asɔnun nga be o lɔ’n be tra 1.000 lele. Kɛ bé jú Zapɔn lɔ’n, nn jasin bofuɛ nga be o lɔ’n be juman blu. Sanngɛ dɔ nga su’n, be tra 200.000 lele. Gileadi suklu’n di anglo nnun. Blɛ sɔ’n nun’n be nian nun suan Ɲanmiɛn Ndɛ’n kpa. Ngunmin atin bofuɛ nin Betɛli lɔ junman difuɛ mun, ɔ nin ngaliɛ difuɛ, ɔ nin akpasua sunianfuɛ mun yɛ be kwla di suklu sɔ’n wie ɔ. Like nga be kle be lɔ’n, ɔ uka be naan b’a suan mɛn wunmuan’n nun Ɲanmiɛn junman’n i dilɛ’n bo.

• ?Ngue ti yɛ be kpɛli atin bofuɛ’m be suklu’n i ba ɔ?

• ?Wan mun yɛ be kwla di Ɲanmiɛn Sielɛ’n i jasin bofuɛ’m be suklu’n wie ɔ?