Chón Pwáraatá Jiowa a fen silleló ren sukulen Paipel. Sókkopaten sukul mi kkóló aúchear ra fen kawor fán iten chókkewe mi áeá watteen fansoun fán iten angangen afalafala ewe Mwú pwe ra tongeni ‘unusen apwönüetä wiser usun eman nöün Kot chon angang.’​—2 Timoty 4:5.

Sukulen Pioneer. Lemuchúlóón án ewe regular pioneer áeúin ierin an pioneer, epwe fiti eú sukul lón úkúkún wonu rán mi tongeni fis lón ewe Leenien Mwich. A kawor ena sukul fán iten an epwe álisi ewe pioneer le arap ngeni Jiowa, epwe lipwákéchúló lón meinisin kinikinin ewe angangen afalafal, me sópweló lón an angang fán tuppwél.

Sukulen Chón Afalafala ewe Mwú. Ei sukul úkúkún ruu maram a kawor fán iten an epwe ákkáiti ekkewe pioneer mi fen sipeéch, iir kewe mi tipemecheres le likitaló leenier pwe ra tongeni feiló lón ewe leeni ia ra tongeni álillis ie. Ren ar áppirú Jesus Kraist ewe Chón Afalafal mi lap seni meinisin, usun itá ra erá: “Ngang üa mochen, kopwe tiniei!” (Aisea 6:8; Johannes 7:29) Ar feiló me towau seni leenier a tongeni wewe ngeni pwe repwe eéreni le eáni eú manaw mi sókkóló seni napanapen manawer me mwan. Neman ewe eérenien ewe leeni, weather, me mwéngé ra fókkun sókko seni met ra fen eérenaaló. Neman epwe pwal lamot ar repwe káé minefé fós. Ei sukul a álisi ekkewe lipich, mwán are fefin, me ekkewe mi pwúpwúlú, ieriir lefilen 23 me 65, ar repwe ámááraatá ekkewe napanapen Chón Kraist mi lamot ngeni wiser kewe me ekkewe tufich mi lamot fán iten ar repwe alapaaló ar angang ngeni Jiowa me an we mwicheich.

Watchtower Bible School of Gilead. Lón fósun Ipru, ewe kapas “Gilead” a wewe ngeni “Watteen Pwáraatá.” Seni 1943 lap seni 8,000 mi sukul Gilead ra titiiló pwe repwe misineri me afalafal “ngeni chon fanüfan meinisin.” (Föför 13:47) Ren chék áwewe, atun ekkewe chón sukul Gilead ra kerán tolong lón Peru, ese mwo wor mwichefel ikena ie, nge iei a wor lap seni 1,000. Atun néúm kewe misineri ra poputá le afalafal lón Japan, a chék wor kis seni engol Chón Pwáraatá, nge iei a wor lap seni 200,000. Ttamen ei sukul úkúkún nimu maram. A kapachelong lón ei sukul ewe káéfichi án Kot we Kapas. Chókkewe mi fiti angangen special pioneer are misineri, are angang lón Bethel, are mi wisen sáifetál me chuuri ekkewe mwichefel, ra ketiw ngeni ei sukul fán iten ar repwe angei káit mi fókkun alóllóól pwe repwe álisi le anúkúchara me apéchékkúla ewe angang wóón unusen fénúfan.

• Met popun a kawor ewe Sukulen Pioneer?

• Ié kewe ra tongeni fiti ewe Sukulen Chón Afalafala ewe Mwú?