Longeso 14

Milimo ya Mishionaliu Yika?

Yena muhasa kuhichika asoko je ni chifuchi che hanga wambujole sango jipema mu yifuchi yeka? Tununu ja Yela ja Yehova che akulinga, ka kukumbulula ngwo, “Yami uno! Ngutume.” (Izaia 6:8) Ayo kanembulula Mishionaliu munene, Yesu Kristu.​—Yoano 7:29.

Milimo ya Mishionaliu yili ngwe kukaula ngano ja Yesu. Zambi kanakatuma Yesu hano hashi hanga apwe mukachi ka akwa shili. Chipwe ngwe kanakamona uhenge, Yesu kakesekele kwalumuna atu ku tachi jenyi. Iye kanakalihumikiza ha mulimo wenyi wa “kwambujola sango lipema lia wanangana wa Zambi”​—we muuhwisa lamba lieswe lia atu. (Luka 4:43) Mishionaliu aumwenemwene kanakaula chilweza cha Kristu.

Mwono wa Mishionaliu unapu ngwe chitapo. Mishionaliu chatamba ejilile mavu a mu chifuchi cheka, ha ndako ni ha kulia, hanji ha ize yinalituchika ni ya mu chifuchi chenyi. Hanji nawa kulilongesa limi liaha lia mu chifuchi chize ali hanga ahase kuhanjika ni atu. Kakwenda chinji, hanji hashi, ha kinga, ha moto, ha wato, hanji mu mashinyi mba ahase kuwana atu a ku mayihunda yisuku. Ha kulinga chitapo chacho, mamishonaliu kakupwa ni zango lia umwenemwene hali atu waze ayo anakwase.

Milimo yacho yinatela fumbo lipema. Yela ja Yehova anji waze hananjila mu mulimo wa Mishionaliu, ayo kakwalongesa ha tukweji atano mu Shikola ya Mbimbiliya ya Ngiliate. Malongeso jacho kakutatwisa ufulielo wo kuli Yehova ni ku Liji lienyi, ni ku ululikiso wenyi. (Yishima 3:5, 6) Nawa ya kwakwasa hanga apwe ni mihuko ya akwa Kristu, ize mamishionaliu chatamba kupwa nayo ku mwono wo, hanga ahase kupwa alongeshi apema a Mbimbiliya. Ayo kakupwa akwa kujama chinji, hanga ambujole sango jipema “ndo ku masongo a hashi.”​—Yilinga 1:8.

▪ Yika mishionaliu chatamba kulinga?

▪ Shikola yika yipema alinayo mishionaliu jetu?

[Kasha/​Chizulie ha lifwo 16]

SHIKOLA YA NGILIATE YINALINGA MILIMO YIPEMA!

Mu limi lia Hepreu, “Ngiliate” linalumbunuka “Mulundu wa Yela.” Chize ha mwaka wa 1943, shikola ya Ngiliate hiyinalongesa kuhianyisa 8.000 a mishionaliu, ayo kakwatuma hanga aye ni kwambujola sango jipema mu unji wa 200 ja yifuchi hanji kuhianyisa, kakulinga kanawa milimo yo. Ngwe chilweza chino, muze mamishionaliu jetu atangu ahetele mu chifuchi cha Peru, te nyichimwe chikungulwila cha Yela ja Yehova chatwaminemo, musono tuli ni 1, 255 ya yikungulwila. Mu Japão nawa te Yela ja Yehova akehe apwilemo, alioze muze mamishionaliu jetu aputukile kulingilamo, musono tuli ni 200, 000 a Yela ja Yehova.

[Chizulie ha lifwo 17]

Estados Unidos

[Chizulie ha lifwo 17]

Shikola ya Ngiliate, Patterson, Nova Iorque

[Chizulie ha lifwo 17]

Panamá