Gila ko neeɓi, Seedeeɓe Yahuwah ɓen no anndiraa fii ganndal maɓɓe Deftere Allah nden. No woodi duɗal fii waajotooɓe saa’iiji ɗin fow fii Laamu Allah ngun, fii no ɓe timminira golle maɓɓe ɗen no feewiri. — 2 Timotee 4:5.

Duɗal ardiiɓe fii ka waajagol. Ka lannitoode hitaande aranere waajotooɗo saa’iiji ɗin fow, o winndoto ka duɗal fii ɓalɗe jeego’o waɗayngal ka Fottirde Seedeeɓe Yahuwah ɓen takko ka o woni ɗon. Ɗun ko fii wallitagol mo no o ɓurtira ɓadaade Yahuwah, no o waawira waajaade no haaniri non e fii no o jokkira golle makko ɗen no feewiri.

Duɗal waajotooɓe fii Laamu Allah ngun. Ngal duɗal fii lebbi ɗiɗi no waɗaa fii jannugol meeɗuɓe waajagol saa’iiji ɗin fow, hebiliiɓe yahugol nokkeeli ɗin fow fii waajagol ka waajotooɓe duuɗaa. No wa’i wa si ɓe wi’a : “ E hino lan ! Imminan ! ” Hiɓe jokki misal annabi Iisaa ngal mawɗo on ka waajagol mo heɓaali ɗimmo e hoore ndi leydi. (Isaaya 6:​8, TMN ; Yuuhanna 7:29) Iwugol ka mun yaha ka woɗi no wondi e satteendi. Hiɓe haani wowtude piiji wano naamuuji, ɲaamete e nokkuure ka ɓe woni ɗon. Hiɓe haani ekkitaade haala yimɓe ɓen. Ngal duɗal wallay worɓe ɓe jommbaa e rewɓe ɓe jommbaaka e jommbuɓe, ɓe duuɓi 23 haa 65 no heɓira kelɗere, ɓe ɲiiɓa ka golle maɓɓe. E fii no ɓe ɓurtira gollande Yahuwah e jamaa makko on.

Duɗal Deftere Allah Suudu Aynirdu Galiidu. E haala Alyahuudinke, “ Galiidu ” no firi “ Dental Seedeeɓe. ” Gila ko Galiidu sincaa 1943, imminaaɓe ko ɓuri 8 000 jannaama e ngal duɗal e hiɓe naɓaa nokkeeli buy e nder aduna on fow fii waajagol “ haa ka kattudi leyɗe. ” (Kuuɗe sahaabaaɓe ɓen 13:47) Fewndo ko imminaaɓe hewti Peru, hari ɓe alaa hay moftal gootal e ndin leydi. Kono hannde hiɓe mari mofte ko ɓuri 1 000. Ko woɓɓe e maɓɓe hewti Zapon, hari Seedeeɓe Yahuwah ɓen hewtaa yimɓe sappo. Kono hannde hiɓe ɓuri yimɓe 200 000. Jannde ko ɓe waɗi kon e nder lebbi jowi Galiidu no walli ɓe heɓugol ganndal luggungal Deftere Allah nden. Waajotooɓe nokkeeli ɗin fow, imminaaɓe e aynooɓe nokkuure, wonuɓe ka yiilirde no nodditaa e ngal duɗal fii no ɓe heɓira ganndal timmungal fii no ɓe wallitora ka waajagol e nder aduna on fow.

• Fii honɗun duɗal ardiiɓe fii ka waajagol waɗanaa ?

• Ko fii hommbo duɗal waajotooɓe fii Laamu Allah ngun waɗanaa ?