Yogunu kuli Jeova Siedinba moandi baadi yaa bangima n ñan U Tienu kani. Yaaba n kuani bi yula cain u laabaaliŋamo kpaanma tuonli nni, baadi yaa cogu n kaa pia lie. Lani n baa todi-ba ban ‘soani bi tuonli bonŋanla’.​—⁠Timote Tilieli 4:⁠5.

Bi Sanuluodiba Cogu. U yogonu kuli sanuluodo yaa cili o tuonli, o cicili binli juodima, o baa fidi gedi bi sanuluodiba cogu yaala waagidi danaluoba. Bi yen tiendi laa cogu yaa Diemdieli n ku leni-​o. Li todi ke u sanuluodo kuti Jeova ŋama, li pugindi o banma u laabaaliŋamo kpaanma nni. Li go todi-​o ke o caa liiga o tuonli nni.

U Diema Laabaaliŋamo Ŋoadikaaba Cogu. Laa cogu waagidi ŋmaalilie. Bi bangi yaa sanuluodiba n pia mi banma bi tuonli nni, yaaba n baa fidi ŋa bi dogu, ki gedi ban todi dogu toa. Nani ki tinga kuli laabaaliŋamo wangika Jesu Kilisiti n yedi yeni, bi moko yedi: “Mini nne, soani nni”. (Esayi 6:⁠8; Jan 7:⁠29) Ti yaa lebidi u dogu, li yen tie tiladi tin lebidi ti yema. Dogu toa niba yantiana, bi jiema naa yen ta leni tin ñani naani. Li go yen tie tiladi tin bangi mabuoli toa. Laa cogu tie ti kpiiba yaaba n ye bi bebe leni yaaba n ñiigi yaapo ki pia bina 23 leni 65 siiga. Bi bangi li dandanli bontiekaaŋanli yaala n baa todi-​ba, ban caa naani kuli. Laa cogu go todi ke Jeova leni o gobiditaanli n ŋanbi soani leni ba.

Galaadi Biibili Cogu. Ŋali ban luodi Galaadi biibili cogu li binli 1943 yeni laa cogu soani missionnaires 8 000 ke ban tieni siedi “hali ŋanduna banlu kuli po”. (Jesu Tondiba Tuona 13:⁠47) Galaadi cogibila n pundi Pedu dogu yaa yogunu, ba nitaanli yendo naa den ye. Dinli-​dinla bi pia nitaanna 1000 bi dogu nni. Missionnaires cuama yogunu, Japon dogu den pia Siedinba 10 bebe. Dinli-​dinla bi pia Siedinba 200 000. Galaadi cogu waagidi ŋmaali 5. Bi sanuluodiba yaaba n ki pia lie, missionnaires, beteli niba, i nitaancianli goandikaaba leni bi puoba n caa laa cogu. Bi baadi yaa bangima n ki pia lie, ke li todi-​ba, ke bi pugini ŋanduna laabaaliŋamo kpaanma tuonli paalu.

• U sanuluodo cogu puuni bee ñoadi?

• Ŋme n baa fidi ki gedi U Diema Laabaaliŋamo Ŋoadikaaba Cogu?