Omahongero okuza ku Jehova ootjiṋa ku ku tjiukirwa Ovahongonone vaJehova okuza koruveze orukuru. Imba mbe riyandjera okuungura otjiungura tjokuzuvarisa ombuze oruveze aruhe ve pewa omahongero wapeke kutja ve ‘yenenise oviungura vyawo avihe.’​—2 Timoteus 4:5.

Oskole yOviungura vyOvakandjira. Komaandero wombura ondenga yokuungura otjomukandjira, omukandjira u tjangisiwa koskole ndji kambura oure womayuva 6 nu ndji tjitirwa pEtuwo rOmerikotameneno ropopezu. Ondando yoskole ndji, oyokuvatera omukandjira kutja ma tumbuke popezu na Jehova, ma rire omupyuke moviṋenge avihe vyokuzuvarisa nu ma kayende komurungu okukarera Jehova nouṱakame.

Oskole yOvazuvarise vOuhona. Oskole ndji kambura omieze 2 ndji, ya utirwa okuhonga ovakandjira mbe nondjiviro ombwa nu mbu mave riyandjere okuisa ehi rawo kutja ve kazuvarise akuhe ku mave heperwa. Pa sana tjimuna owo ve tja, “Owami ngwi, ndji hinda!” mokuhorera kOmuzuvarise omunenenene ngwa ri kombanda yehi, Jesus Kristus. (Jesaja 6:8; Johanes 7:29) Okutjindira kokure nehi roye mape ya aku kamburire mo okuyakura ongaro yehupo ndja panguka ku indji ndji wa iririra. Ombazu, omuinyo weyuru novikurya mape ya avi panguka tjinene ku imbi eye mbya iririra. Nu potuingi ku rira ohepero okurihonga eraka epe. Oskole ndji i vatera ovarumendu novakazendu ovakombe novakupasane vozombura 23 nga 65, kutja ve kurise ovikaṋena vyOukriste mbi mavi ve vatere moviungura vyawo nokukurisa ounongo wawo kutja ve yenene okuungurisiwa tjinene i Jehova notjira tje.

Oskole yaGilead. MOtjiheberi, omaheero wembo ndi “Gilead” ye notjiṋa ‘nokuhongonona.’ Okuza kombura 1943, ovahindwa vokombanda 8 000 mba pitira moskole yaGilead va hindwa kutja ve kayandje omahongononeno ‘mouye auhe’ nondoṋeno. (Oviungura 13:47) Indu ovahindwa tji ve ya moPeru, kamwa ri ozombongo zOvahongonone vaJehova mehi ndo. Nai mu nozombongo zokombanda 1 000. Indu ovahindwa vetu tji va uta okuzuvarisa moJapan, kwa ri nOvahongonone vokehi yomurongo uriri. Nai mu nOvahongonone vaJehova vokombanda 200 000. Omahongero womieze 5 nge yandjwa poGilead ye kamburira mo omakonḓononeno omakoto wEmbo raMukuru. Imba mbe karera otjovakandjira vapeke poo ovahindwa, na imba mbe karera Jehova potutavi twozomberoo poo mbe ri motjiungura tjokuvarura ozombongo, ve ṋangwa kutja ve ritjangise koskole ndji kutja ve hongwe nu ve kurise oviungura vyokuzuvarisa mouye auhe.

• Ondando yOskole yOviungura vyOvakandjira oyatjike?

• Oskole yOvazuvarise vOuhona ya utirwa okuhonga uṋe?