Ka jinghikai bakynja Blei ka long ka dak ba la slem bha jong ki Nongsakhi U Jehobah. La pynkhreh ïa ki skul bakyrpang na ka bynta kito kiba trei pura ïa ka kam ïalap khnang ba kin lah ban “pyndep ïa la ka kam nongïalap.”—2 Timotheus (Timothi) 4:5, Baibyl Khasi Katholik.

Ka Skul na ka bynta ki Pioneer. Ynda ki pioneer batista ki la trei pura shisnem, ïa ki la ju pynrung kyrteng ha ka skul ba hynriew sngi kiba ju pynlong ha ka Ïing Hima ba jan tam. Ka jingthmu jong kane ka skul ka long ban ïarap ïa ki pioneer ban kham jan sha U Blei, ban kham seisoh ha baroh ki liang ka kam ïalap bad ban ïai trei minot.

Ka skul na ka bynta ki nongïalap ïa ka Hima. La pynkhreh kyrpang ïa kane ka skul ba ar bnai ban hikai ïa ki pioneer ba la tbit kiba don ka mon ban ieh ïa la ka jaka ba ki sah bad ban leit shakri kat shaba donkam. Long kumba ki ong, “Nga hangne; to phah ia nga” kum ban pyrthuh bud ïa u Jisu Khrist, u Nongïalap bakhraw tam ha ka pyrthei. (Isaiah 6:8; Ioannis 7:29) Jngai na la ïing ki hap ban im ka jingim kaba shisur shidur. Ka dustur, ka jinglong ka suiñ bneng bad ki jingbam ki lah ban pher bak-ly-bak na kaei kaba ki ju mlien. Don ki khep kiba ki hap wat ban nang ïa ka jait ktien bathymmai ruh. Kane ka skul ka dei na ka bynta ki para bangeit kiba dang marwei bad ïa ki shikurim, kiba don hapdeng ka rta kaba 23 haduh 65. Ka ïarap ïa ki ban ïoh ïa ki jinglong bakynja mynsiem bad ki jingstad ba lah ban pyndonkam da U Jehobah bad ka seng jong u.

Ka Skul Baibl Kut Ap Phira jong ka Gilead. Ha ka ktien Hebru “Gilead” ka mut “Ka Sakhi ba Kynton.” Naduh ba la sdang ïa ka Gilead ha u snem 1943, palat 8,000 ngut ki la wan sha kane ka skul bad la phah ïa ki kum ki mishoneri ban sakhi “shaduh kaba kut ka pyrthei.” (Kam 13:47) Haba ki mishoneri ki la poi ha ka sien banyngkong eh ha Peru, ym pat don kawei ruh ka balang hangta. Mynta pat ki don haduh palat 1,000 tylli ki balang. Mynba ki mishoneri ki la sdang ban shakri ha Japan, ym don wat tang shiphew ngut ruh ki Nongsakhi. Mynta pat ki don palat 2,00,000 ngut. Ka jingpule ba san bnai ha Gilead ka kynthup ïa ka jingpule bniah ïa ka ktien U Blei. La khot sngewbha sha kane ka skul ïa kito kiba shakri kum ki pioneer bakyrpang ne kiba don ha ki tnad treikam ne ïa ki nongsharai jylli, ban kham ïoh jinghikai shuh shuh ban pynskhem bad ban pynkhlaiñ ïa ka kam ïalap ha satlak ka pyrthei.

• Kaei ka jingthmu jong ka Skul na ka bynta ki Pioneer?

• Mano ba lah ban wan sha ka Skul ki Nongïalap ïa ka Hima?