Ehongo lopaKriste ola kala hali didilikifa mo Eendombwedi daJehova. Eefikola de likalekelwa oda longekidilwa ovo va hala okulonga efimbo liyadi moilonga yokuudifa Ouhamba opo va dule ‘okuwanifa po nawa oukalele wavo.’ — 2 Timoteus 4:5, NW.

Ofikola yOkudeula Ovaudifi. Pexulilo lomudo wotete womukokolindjila oo e li moilonga yefimbo liyadi, oha tambulwa kofikola yomafiku a hamano oyo tashi dulika hai kala mOlupale lOuhamba olo li li popepi naye. Elalakano layo okukwafela ovakokolindjila va ehene popepi naJehova, va pondole meembinga adishe doukalele nokutwikila okulonga noudiinini moilonga yavo.

Ofikola yOvaudifi vOuhamba. Ofikola ei yeemwedi mbali oya longekidilwa okudeula ovakokolindjila ovo va pyokoka nove na ehalo okufiya po omaumbo avo opo va ka longe koitukulwa oko ku na omhumbwe inene yovaudifi. Ohava hopaenene Jesus Kristus, Omuudifi munene oo a li kombanda yedu, eshi hava ti “Aame ou, tume nge!” (Jesaja 6:8, Johannes 7:29) Okutembukila kokule nomaumbo avo osha kwatela mo okutambula ko onghedi yokukalamwenyo yanafangwa molwaashi eenghedi, onghalo yomhepo noikulya otashi dulika i kale ya yooloka. Otashi dulika yo nokuli tashi pula ve lihonge elaka lipe. Ofikola ei ohai kwafele ovamwatate novamwameme ovo inava hombola ile inava hombolwa novalihomboli ovo ve li pomido 23 fiyo 65, opo va kulike omaukwatya avo opamhepo oo va pumbwa moilonga yavo nounghulungu oo tau va kwafele va longifwe pauyadi kuJehova nokehangano laye.

Ofikola yOmbibeli yoWatchtower yaGilead. Oshitya osho sha tolokwa mOshiheberi “Gilead” otashi ti “Ongudu yEendombwedi.” Okudja eshi o-Gilead ya totwa mo 1943, Eendombwedi di dule 8 000 odo da li da mana ofikola oyo oda li da tumwa onga ovatumwa opo di ka udife “fiyo okominghulo dedu” opo di ka pondole shihapu. (Oilonga 13:47) Eshi ovatumwa votete va fika moPeru, moshilongo ka mwa li mu na nande eongalo limwe. Paife omu na omaongalo e dule 1 000. Eshi ovatumwa va tameka okulonga moJapani, moshilongo omwa li ashike mu na Eendombwedi inadi fika komulongo. Paife omu na Eendombwedi di dulife 200 000. Eemwedi nhano domalideulo kOfikola yaGilead oda kwatela mo okukonakona Eendjovo daKalunga. Ovo tava longo ve li ovakokolindjila ve likalekelwa, ovatumwa, ovo ve li koitaimbelewa novapashukili voshikandjo ohava shivwa kofikola oyo opo va ka deulwe va pameke nokudiinina oilonga yavo.

• Elalakano lOfikola yOkudeula Ovakokolindjila olashike?

• Ofikola yOvaudifi vOuhamba oya longekidilwa oolyelye?