Malongi ya mambu ya teokrasi kele diambu mosi ya nene na Bambangi ya Yehova banda ntama. Bau kepesaka bantu yina mekikupesaka ntangu nionso na kisalu ya kusamuna Kimfumu malongi samu ‘bakokisa kisalu ya bau mbotembote.’​—2 Timoteo 4:5.

Kalasi ya Bampasudi-nzila. Kana mpasudi mekokisa mvula na yandi ya ntete na kisalu ya ntangu nionso, bakebokilaka yandi na kalasi ya bilumbu sambanu yina kesalamaka mbala nkaka na Yinzo ya Kimfumu yina kele ntama ve na kisika bau mevuanda. Mfunu ya kalasi yango kele ya kusadisa mpasudi-nzila yandi pusana penepene na Yehova, yandi zaba kusala kisalu na yandi mbote na mambu nionso, mpe yandi tatamana na kisalu na yandi.

Kalasi ya Biblia samu na Bansamuni ya Nsangu ya Mbote ya Kimfumu. Kalasi yango ya bangonda zole mesalamaka samu na kupesa formasyo na bampasudi-nzila yina memesana na kisalu mpe bau mendima kubika buala na bau mpe kukuenda kusala na kisika nionso yina bakevuanda na nsatu na bau. Bau ketubaka mpenza mutindu yayi: “Munu yayi! Tinda munu!” mutindu Yesu Klisto yina vuandaka nsamuni ya nsangu ya mbote yina meluta bansamuni nionso awa na ntoto tubaka. (Yezaya 6:8; Yoane 7:29) Kana nge mendima kukuenda vuanda na buala yina kele ntama na yina ya beno, yau lenda lomba nge ndima kuvuanda na luzingu yina mesuasana na yina nge mesanaka na yau. Bantu ya kisika nge mekuenda balenda vuanda na mimeseno yankaka, kuna muini to madidi lenda vuanda ngolo kuluta na buala na beno, nge lenda kuta madia yina nge mesana na yau ata fioti ve. Yalenda lomba nge longuka ndinga yankaka. Kalasi yango kesadisa bampangi ya babakala mpe ya banketo yina kele bampupa mpe bayina mekuelaka, banda mvula 23 ti 65 bakudisa bikadulu ya buklistu yina lenda sadisa bau na kisalu yina bakepesa bau, mpe bakudisa mayele na bau samu Yehova na nkubukulu na yandi bakoka kusadila bau mingi.

Galaad, kalasi ya Watchtower samu na malongi ya Biblia. Na ndinga ya Ebreo, “Galaad” zola monisa “kimbangi.” Banda Galaad salamaka na 1943, bantu kuluta 8 000 mebakaka formasyo na kalasi yango mpe bau tindamaka bamisionere “tii na nsuka ya ntoto ya mvimba,” mpe bau pesaka kimbangi ya nene. (Bisalu 13:47) Ntangu bamisionere ya beto kumaka samu na mbala ya ntete na buala Pérou, ata kimvuka mosi vuandaka kuna ve. Kansi bubu yayi, bimvuka mekuma kuluta 1 000. Katula yau, ntangu bamisionere na beto bandaka kusamuna na Japon, Bambangi vuandaka ve ata kumi. Kansi bubu yayi, bamekuma kuluta 200 000. Malongi ya Galaad kezingilaka ngonda tanu, mpe bau kelongukaka malongi ya Biblia na mpinda. Bampasudi-nzila ya nene, bamisionere, bantu yina kele na babiro ya filiale, mpe bakengidi ya kizungidila nde kebokuluaka na kalasi yango. Bakebakaka formasyo ya mpinda samu na kuzaba kuvuandisa mpe kuyedisa kisalu na yinza ya mvimba.

• Kalasi ya Bampasudi-nzila kele na yinki mfunu?

• Banani lenda kota na Kalasi ya Bansamuni ya Nsangu ya Mbote ya Kimfumu?