E sikola za kimfumu i diambu diamfunu kuna kwa Mbangi za Yave. Vena ye sikola zakubikwa mu kuma ki’awana besamunanga nsangu za Kintinu ntangwa ke ntangwa muna kubasadisa ‘balungisa uselo wau’ una ufwene.​—2 Timoteo 4:5.

Sikola ya Salu kia Kimviti a Nzila. Vava o mviti a nzila kelungisanga mvu umosi muna salu kia ntangwa ke ntangwa, obokelwanga mu kota muna sikola ya lumbu sambanu. Sikola yayi ilenda vangamena muna Seka dia Kintinu. E kani dia sikola yayi i sadisa aviti a nzila bafinama Yave, bazaya una balenda sila umbangi una ufwene yo kubasadisa mu kwamanana muna salu kiau.

Sikola ya Ateleki a Kintinu. E sikola yayi ya ngonde zole, yakubikwa muna sadisa aviti a nzila azikuka ana bena yo luzolo lwa kwenda sadila kuna kuvuilu ateleki ayingi o mfunu. Ampangi awaya bevovanga vo, “Mono oyu; untuma!” Muna mpila yayi, belandanga e mbandu a Yesu Kristu una vo i Nteleki osundidi ateleki awonso basadila va ntoto. (Yesaya 6:8; Yoane 7:29) Okwenda zingila ku zunga kiankaka divavanga vo muntu kayukulukila e mpila zingu kia zunga kiakina. E fu, nsungi ye madia malenda kala maswaswana ye ma zunga kiandi. Dilenda mpe vava vo muntu kalongoka ndinga yankaka. E sikola yayi isadisanga mpangi bena ye mvu 23 yaku 65 ana bena vo mpumpa ye ana basompa mu longoka mana bevuanga mfunu muna salu kiau yo vua ndekwa zilenda kubafila mu toma sadilwa kwa Yave ye nkubik’andi.

Escola Bíblica de Gileade da Torre de Vigia. Muna kiyibere, o mvovo “Gileade” (Ngiladi) una ye nsasa vo “Umbangi Wayingi.” Tuka kiayantikila sikola ya Ngiladi muna mvu wa 1943, vioka 8.000 ma alongoki a sikola yayi bafilwa ku nsi zankaka nze misionario muna sila umbangi “yakuna nsuk’a nza,” ediadi nluta miayingi ditwasanga. (Mavangu 13:47) Vava mpangi bakota sikola yayi balwaka kuna nsi ya Peru, ke kwakala kana nkutakani imosi ko. Owau kuna ye vioka 1.000 dia nkutakani kuna nsi yayi. Vava misionario bayantika salu kiau kuna nsi ya Japão, tezo kia kumi dia Ateleki kaka bakala muna nsi yayi. Owau kuna ye vioka 200.000 ma ateleki. Muna ngonde tanu bevanganga muna sikola ya Ngiladi, ampangi belongokanga Nkand’a Nzambi una ufwene. Aviti a nzila especiale, misionario, esi betele ye akengi a zunga, bebokelwanga muna kota sikola yayi muna toma sikidisa ye siamisa salu mu nza yawonso.

• Adieyi i kani dia Sikola ya Aviti a Nzila?

• Nani olenda kota Sikola ya Ateleki a Kintinu?