Ukwanda kale, Abakaboni ba Yehova bakumanyikwa na masukulu aghakumanyisya ivya Chala. Bo biyipa ukulumbilila izya Bumwene akabalilo kosi bakumanyilako amasukulu aghapalubazu. Amasukulu agha ghakubavwa ukuti babombe akiza ‘imbombo yabo iya bulumbilili.’—2 Timoti 4.5.

Isukulu iya Bapayiniya. Nanti umupayiniya uwakabalilo kosi amala umwaka, akwingila isukulu iya masiku sikisi. Akabalilo kamo, yikubombiwa pa Nyumba iya Bumwene iyapapipi. Isukulu iyi yikubavwa abapayiniya ukupalamila kwa Yehova, ukuti babombe akiza imbombo yabo, sona ukuti babukilile.

Isukulu iya Balumbilili aba Bumwene. Isukulu iyi yikusenda imyezi yibili. Yikwavwa abapayiniya bo bangakwanisya ukubuka kulikosi ko bakulondiwa. Bope bakuti, ‘Une pano! Muntume!’ Abene bakumuyezya u Yesu Kilisitu, Umulumbilili umukulu nkani. (Yesaya 6.8; Yohani 7.29) Nanti umupayiniya asama, abaghiye ukwiyima vimo. Akabalilo kamo, akikalile, impepo, ni vyakulya vingaba vyakupambana na ko afuma. Sona angalondiwa ukumanyila ichinenelo ichinji. Abapayiniya abamaka 23 mpaka 65 bo bali pasendwa na bo bate pasendwa, bangingila isukulu iyi. Isukulu iyi yikubamanyisya ukuba ni nkalo zyo zingabavwa pa mbombo yabo, sona ukuti baye bakwenelela ukuti u Yehova ni gulu lyache, bababombezye imbombo umwakukwana.

Isukulu iya Giliyadi (Watchtower Bible School of Gilead). Mu Chihebele, izina lyakuti “Giliyadi” likung’anamula “Ichibunga icha Mabwe.” Isukulu iyi yikanda mu 1943. Ukufuma mu mwaka ughu, abantu abakupululila 8,000 bamanyila isukulu iyi. Nanti bamala ukumanyila, bakubatuma ngati bamishonale polelo balumbilila pa ‘chisu chosi ichapasi.’ (Imbombo 13.47) Ku Peru kutakaba ichipanga nachimo po abamishonale bakafikagha. Ilelo, kuli ivipanga ivyakupululila 1,000. Ku Japan Abakaboni ba Yehova batakakwanagha 10 po abamishonale bakandagha imbombo yabo. Ilelo, kuli Abakaboni abakupululila 200,000. Isukulu iya Giliyadi yikusenda imyezi 5. Bo bakwingila isukulu iyi, bakumanyila Ibayibolo umwakufwasilila nkani. Bo bakwitiziwa ku sukulu iyi bakuba abapayiniya bapalubazu, abamishonale, bo bakubomba ku maofesi agha Bakaboni ba Yehova, pamo bo bakwendela ivipanga. Nanti bamala ukumanyila, bakwavwa ukuti imbombo yendaghe akiza pa chisu chosi.

• Choni cho kuli Isukulu iya Bapayiniya?

• Bo bawenu bo bakwingila Isukulu iya Balumbilili aba Bumwene?