Lwiiyo luswa kuli Lesa ncintu ciyandika abuumbi kuBakamboni Bakwe Yehova. Lwiiyo lulibetele lulapekwa kubaabo balyaaba muncito ya Bwaami yaciindi coonse kwaamba ayi ‘bakumanishe cakumaninina nciito yabo.’—2 Timoti 4:5, NWT.

Cikolo ca Bapainiya. Na peenda mwaaka womwi kuswabo ndyaakatalika bupainiya bwaciindi coonse, mupainiya uleetwa kucikolo ca nshiku 6, ico ceenga cabeta paŊanda ya Bwaami ili kufwaafwi a nkwakala. Cikolo ici cakabambilwa kucafwa bapainiya kuyumya bushicibusa bwabo aYehova, kwiiya nshila shipusenepusene shakushimikila makani abotu, akubacafwa kwaamba ayi beendilishe muncito ya bupainiya.

Cikolo ca Bashimikila sha Bwaami. Cikolo ici cilatola myeenshi yobilo alimwi cakabambilwa bapainiya bacite lushibo bakalyaaba kuya mukusebensela kumusena kuli beshikushimikila baniini. Balaamba ayi “Mpoondi Nkambo, amuntuume!” (Isaya 6:8; Joni 7:29) Balalyaaba bweenka bwakacita Shikushimikila munene wakekalaako pacishi, Yesu Klistu. Kuya mukusebensela kumusena kulaale ankomukala kulayandika kuba abuumi bwakutalila shintu shiinji. Milawo, muuwo, ashakulya shilaba shipuseneeko anshebakashibila. Cimwi ciindi inga mwayandika kwiiya mushobo umwi. Cikolo ici cilacafwa bamakwesu bateebete, benankashi bateebetwe alimwi abeebene, bacite myaaka 23 kushika ku 65, kukomenya miibo yakumushimu alwiiyo lweshi lukabacafwe kusebensa kabotu muncito yabo alimwi akusebenseshekwa aYehova alibunga lyakwe.

Cikolo ca Gilyadi. Mu ciEbulu, liswi lya “Gilyadi” lilaamba “Bumboni Buunji.” Kuswa ciindi Gilyadi ndyeyakatalika mu 1943, bakamanisha cikolo ici baleenda 8,000, bakatumwa mbuli bamishonali kuya mukushimikila “kushikila kumanina cishi ca panshi” akuswitilila. (Milimo ya Batumwi 13:47, NWT) Bakeeya cikolo ici ndyebakashika kucishi ca Pelu, takwakalingawo libungano nabi lyomwi mucishi ici. Ono pacecino ciindi kuli mabungano eendilila ku 1,000. Bamishonali besu ndyebakatalika kushimikila kuJapan, Bakamboni tabakalinga kwiindilila 10 mucishi ici. Pacecino ciindi balindite 200,000. Cikolo ca Gilyadi cilatola myeenshi 5 kwiiya Maswi akwe Lesa Baibo cakushikaawo. Abo basebensa mbuli Bapainiya balibetele na bamishonali bali muncito yakushimikila, bali pamaofesi amusampi, na bali muncito yalubasu baleetwa kucikolo ici kwaamba ayi baiishikwe mbweenga bacafwa alimwi akuyumya ncito yakushimikila yapacishi coonse.

• Ino Cikolo ca Bapainiya cilacafwa buyani?

• Ino Cikolo ca Bashimikila sha Bwaami cakabambilwa baani?