ບົດທີ 14
ມີໂຮງຮຽນໃດແດ່ທີ່ເປີດໄວ້ສຳລັບຜູ້ທີ່ເປັນໄພໂອເນຍ?
ສະຫະລັດອາເມຣິກາ
ໂຮງຮຽນກິລຽດຢູ່ ແພັດເຕີສັນ ເມືອງນິວຢອກ
ປານາມາ
ລັກສະນະເດັ່ນຂອງພະຍານພະເຢໂຫວາແມ່ນມີການສຶກສາຕາມລະບອບການຂອງພະເຈົ້າມາດົນແລ້ວ. ໂຮງຮຽນທີ່ພິເສດນີ້ຈັດໄວ້ສຳລັບຜູ້ທີ່ໄດ້ອຸທິດຕົວເພື່ອການປະກາດເລື່ອງລາຊະອານາຈັກຂອງພະເຈົ້າແບບເຕັມເວລາ ເພື່ອເຂົາເຈົ້າຈະ ‘ເຮັດວຽກງານຮັບໃຊ້ໃຫ້ສຳເລັດຄົບຖ້ວນ.’—2 ຕີໂມເຕ 4:5
ໂຮງຮຽນການຮັບໃຊ້ສຳລັບໄພໂອເນຍ. ເມື່ອພີ່ນ້ອງຊາຍຫຼືຍິງຮັບໃຊ້ເຕັມເວລາປະເພດໄພໂອເນຍປະຈຳຮອດໜຶ່ງປີແລ້ວ ເຂົາເຈົ້າກໍສາມາດສະໝັກເຂົ້າໂຮງຮຽນນີ້ໄດ້ເຊິ່ງອາດຈະຈັດຂຶ້ນໃກ້ ໆ ກັບຫໍປະຊຸມລາຊະອານາຈັກແລະໃຊ້ເວລາຮຽນເປັນເວລາຫົກວັນ. ໂຮງຮຽນນີ້ຈັດຂຶ້ນເພື່ອຊ່ວຍໄພໂອເນຍໃຫ້ໃກ້ຊິດກັບພະເຢໂຫວາຫຼາຍຂຶ້ນ ຊ່ວຍເຂົາເຈົ້າໃຫ້ເກີດຜົນແລະຮັບໃຊ້ຢ່າງສັດຊື່ຕໍ່ ໆ ໄປ.
ໂຮງຮຽນສຳລັບຜູ້ເຜີຍແພ່ເລື່ອງລາຊະອານາຈັກ. ໂຮງຮຽນນີ້ຈະດຳເນີນເປັນເວລາສອງເດືອນແລະຈັດຂຶ້ນເພື່ອຝຶກໄພໂອເນຍທີ່ເກີດຜົນເຊິ່ງເຕັມໃຈທີ່ຈະຈາກບ້ານເກີດຂອງຕົນເພື່ອໄປຮັບໃຊ້ໃນບ່ອນທີ່ຂາດເຂີນຜູ້ປະກາດ. ໂດຍການຮຽນແບບພະເຍຊູຄລິດຜູ້ເຜີຍແພ່ຜູ້ຍິ່ງໃຫຍ່ທີ່ສຸດເຊິ່ງເຄີຍຮັບໃຊ້ທີ່ແຜ່ນດິນໂລກ ໃນຄວາມເປັນຈິງເຂົາເຈົ້າກຳລັງບອກວ່າ “ຂ້ານ້ອຍຢູ່ທີ່ນີ້ ເຊີນພະອົງໃຊ້ຂ້ານ້ອຍໄປ.” (ເອຊາອີ 6:8; ໂຢຮັນ 7:29) ການທີ່ຈາກບ້ານເກີດໄປກໍຈຳເປັນຕ້ອງໄດ້ປັບຕົວໃຫ້ເຂົ້າກັບມາດຕະຖານການເປັນຢູ່ໃນແບບທີ່ຮຽບງ່າຍ ລວມເຖິງວັດທະນາທຳ ສະພາບອາກາດ ແລະອາຫານເຊິ່ງອາດແຕກຕ່າງກັນຢ່າງສິ້ນເຊີງຈາກສິ່ງທີ່ຕົນຄຸ້ນເຄີຍ. ອາດຈຳເປັນຕ້ອງໄດ້ຮຽນພາສາໃໝ່. ໂຮງຮຽນນີ້ຈະຊ່ວຍພີ່ນ້ອງຊາຍຍິງທີ່ຍັງໂສດແລະຄູ່ຜົວເມຍເຊິ່ງມີອາຍຸຕັ້ງແຕ່ 23 ເຖິງ 65 ປີ ໃຫ້ພັດທະນາຄຸນສົມບັດທີ່ຈຳເປັນໃນງານມອບໝາຍແລະໃຫ້ມີທັກສະຫຼາຍຂຶ້ນເພື່ອພ້ອມທີ່ຈະເຮັດວຽກຂອງພະເຢໂຫວາແລະອົງການຂອງພະອົງຢ່າງເຕັມທີ.
ໂຮງຮຽນວັອດທາວເວີແຫ່ງກີລຽດ. ໃນພາສາເຫັບເລີຄຳວ່າ “ກີລຽດ” ໝາຍເຖິງ “ກອງພະຍານ.” ໂຮງຮຽນກີລຽດເລີ່ມຕົ້ນຂຶ້ນໃນປີ 1943 ນັບຕັ້ງແຕ່ນັ້ນມາຈຶ່ງມີນັກຮຽນຈົບຈາກສຶກສານີ້ຫຼາຍກວ່າ 8.000 ຄົນ ທີ່ຖືກສົ່ງອອກໄປໃນຖານະເປັນມິດຊັນນາລີເພື່ອເຮັດວຽກປະກາດໃຫ້ສຳເລັດ “ຈົນເຖິງທີ່ສຸດແຜ່ນດິນໂລກ.” (ກິດຈະການ 13:47) ຕົວຢາງເຊັ່ນ ເມື່ອຜູ້ທີ່ຈົບການສຶກສາຈາກໂຮງຮຽນນີ້ໄປທີ່ປະເທດ ເປຣູ ຕອນນັ້ນຍັງບໍ່ທັນມີປະຊາຄົມ ແຕ່ໃນທຸກມື້ນີ້ມີຫຼາຍກວ່າ 1.000 ປະຊາຄົມ. ເມື່ອມິດຊັນນາລີເລີ່ມເຂົ້າມາຮັບໃຊ້ໃນປະເທດຍີ່ປຸ່ນ ຕອນນັ້ນທົ່ວປະເທດມີພະຍານພຽງແຕ່ສິບກວ່າຄົນ ພໍເຖິງທຸກມື້ນີ້ມີຫຼາຍກວ່າ 200.000 ຄົນ. ຫຼັກສູດກີລຽດດຳເນີນເປັນເວລາ 5 ເດືອນເຊິ່ງຈະມີການສຶກສາຄຳພີໄບເບິນຢ່າງລະອຽດຖີ່ຖ້ວນ. ຈະມີການເຊີນຜູ້ທີ່ຮັບໃຊ້ປະເພດໄພໂອເນຍພິເສດ ຫຼືມິດຊັນນາລີໃນເຂດມອບໝາຍປະກາດ ຜູ້ຮັບໃຊ້ໃນສຳນັກງານສາຂາ ຜູ້ດູແລໝວດ ໃຫ້ເຂົ້າຮ່ວມໃນໂຮງຮຽນນີ້ເພື່ອຈະຮັບການຝຶກອົບຮົມຢ່າງລະອຽດເພື່ອຈະເຮັດໃຫ້ວຽກງານທົ່ວໂລກມີຄວາມໝັ້ນຄົງແລະເພີ່ມທະວີຂຶ້ນ.
-
ໂຮງຮຽນການຮັບໃຊ້ສຳລັບໄພໂອເນຍມີໄວ້ເພື່ອເຮັດໃຫ້ສິ່ງໃດສຳເລັດ?
-
ໂຮງຮຽນສຳລັບຜູ້ເຜີຍແພ່ເລື່ອງລາຊະອານາຈັກມີໄວ້ສຳລັບຜູ້ຮັບໃຊ້ປະເພດໃດແດ່?