Yo testigo e Jehová janrraji ke me na joo ke ra pjechiji kʼo mama ne Biblia, ngekʼua xampꞹji escuela ja poji yo kjuarma ñe yo kju̱ʼu̱ kʼꞹ jichiji yo ntee o Jñaa e Mizhokjimi na punkjꞹ paa. Akjanu ra pjechiji ra xøpꞹji na joo yo ntee (2 Timoteo 4:5).

Escuela ja poji yo precursor. Kʼe escuela mezhe ñanto paa, kjaji kja na ngumꞹ ja jmurꞹji yo testigo e Jehová, ma yo precursor regular sotꞹji na kjɇɇ pojinu. Kʼe escuela o tsjaji ngekʼua ra jichiji yo precursor ja rga mbøsʼꞹji yo ntee xo jichiji pje ra tsjaji ngekʼua ra sʼiyaji e Jehová ñe dya ra jyɇziji nu na kjaji.

Escuela ja jichiji yo precursor ra nⱥdʼⱥji o Reino Mizhokjimi. Nunu søø ra moji yo dya bʼe chjꞹntꞹji ñe yo ya chjꞹntꞹji. Kʼo nee ra mojinu pɇski ra ɇnji 23 asta 65 kjɇɇ ñe ya pɇsʼiji na punkjꞹ tsjɇɇ kʼꞹ ngeji precursor. Pɇski ra moji ja ra xipjiji zo me na je̱e̱ ja ra ma zopjꞹji yo ntee. Angezeji kjaji ja ba tsjaa e Jesucristo kʼꞹ go jichi na punkjꞹ ntee o jñaa e Mizhokjimi ma go e̱je̱ kja ne Xoñijomꞹ, kʼo kjuarmakʼo ñe yo kju̱ʼu̱ mamaji ga kjaba: “Ri bʼꞹbʼꞹtrjogoba, chⱥkjⱥgo ra mago” (Isaías 6:8; Juan 7:29). Ma ga sⱥtrʼⱥji nu ja pejñeji, nunu nʼaño ja ga minji dya nge nzakja nu ja menzumꞹjikʼo, pɇski ra pjechiji o idioma kʼꞹ ñaji yo nteenu, yo jñonꞹ kʼo ra sijinu dya nge nzakja kʼo mi siji ma mi bʼꞹnji kja o ngunji, xo bʼꞹbʼꞹ ma ga sⱥtrʼⱥji nu ja me na paʼa ne jyarꞹ o me na sɇɇ. Kja kʼe escuela jichiji ra jonteji, ra pjøxteji, ra sʼiyaji yo ntee, ra ndeptjoji, ra sɇchiji yo ra kjogꞹjinu. Ga kjanu pjøsʼꞹji o bʼɇpji nu na kjaa o organización e Jehová kja ne Xoñijomꞹ.

Escuela Bíblica de Galaad de la Watchtower. Ne escuela go mbꞹrꞹ nu kjɇɇ 1943, ya moji na punkjꞹ kjuarma ñe kju̱ʼu̱, ixi kjogꞹ ocho mil kʼo ya mbedyejinu nzakja misionero, o mbejñeji me na je̱e̱, nudya a go mbøsʼꞹji na punkjꞹ ntee kja texe ne Xoñijomꞹ ra mba̱ra̱ji Mizhokjimi (Hechos 13:47). Nzakja ma yo misionero go zⱥtrʼⱥji a Perú mi otrjo congregación, pe nudya ixi kjogꞹtrjo mil congregación. Ma go zⱥtrji a Japón yo misionero dya bʼe mi zoo dyechʼa Testigo, pe nudya ixi kjogꞹ dosciento mil. Nu escuelanu mezhe tsichʼa zana, kʼo pojinu xørꞹji na joo ne Biblia ngekʼua ra tendioji na joo. Kja kʼe escuela jichiji ja rga mbøsʼꞹji yo kjuarma ngekʼua sido ra jichiji yo ntee o Jñaa Mizhokjimi kja texe ne Xoñijomꞹ. Yo kjuarma ñe yo kju̱ʼu̱ kʼꞹ søø ra moji ngeje yo precursor especial, yo misionero kʼo ya jichiji yo ntee, yo superitendente ñe o suji, ñe yo pɇpji kja yo sucursal.

• ¿Pje jichiji kja kʼe Escuela ja poji yo precursor?

• ¿Kjo nge kʼo søø ra moji kja kʼe Escuela ja jichiji yo precursor ra nⱥdʼⱥji o Reino Mizhokjimi?