Idaunega amo ema bona hari, Iehova ena Witnes taudia na tiokratik sikuli idau-idau amo Dirava ena dala e dibaiamu. Unu sikuli ese Basileia e harorolaia hanaihanaimu taudia e hadibadiamu, unu amo ‘edia hesiai karana bae haḡuḡurua’ diba.—2 Timoteo 4:5.

Painia Sikulina. Laḡani ta e regula painia taudia na una sikuli ai bae vareai diba. Una na dina siks lalodiai Kingdom Hall ai e karaiamu sikulina. Una ese painia taudia e durudiamu Iehova bae badinaia, haroro daladia idau-idau bae ḡaukaralaidia namonamo, bona painia ḡaukara bae goadalaia.

Basileia Evanelia Sikulina. Una na hua rua lalodiai e karaiamu sikulina. Bema ta na laḡani momo vada e painia, bona e uramu ena kongrigeisen baine rakatania bena idau gabu ai haroro ḡaukara baine durua, ia na una skuli ai baine vareai diba. Anina na ia na e gwaumu, “Lau o ina, a siagu,” bona Haroro Tauna Hereadaena, Iesu Keriso, e tohotohoamu. (Isaia 6:8; Ioane 7:29) Ia be lao heniamu gabunai, ḡau iboudiai na matamata, heḡereḡere mauri dalana, kastom, weda, bona aniani. Reana gado matamatana be dibaiamu. Basileia Evanelia Sikulina ese laḡanidia 23 ela 65 singul tadikaka, singul taihu, bona headava taudia be durudiamu, edia hesiai ḡaukara ai kara namodia bae hahedinarai noho totona, bona Iehova bona ena orea ese dala idau-idau ai bae ḡaukaralaidia daladia be dibamu.

Gilead Sikulina. Heberu gado herevana, “Gilead,” anina na, witnes o haroro. Laḡani 1943 amo, Gilead sikulina amo e gradueit misinari taudia 8,000 mai kahana e siaidia, “tanobada dokodia idoidiai” e haroromu, bona momo e durudiamu. (Kara 13:47) Emai misinari taudia na nega ginigunana Peru ai e kau neganai, kongrigeisen ta na lasi. Hari, unuseniai kongrigeisen na 1,000 mai kahana. Emai misinari taudia na Japan ai edia ḡaukara e hamatamaia neganai, Iehova ena Witnes taudia na 10 bamona. Hari, unuseniai kongrigeisen na 200,000 mai kahana. Gilead sikulina na hua 5 lalodiai e karaiamu, bona sikuli taudia na Baibel e stadilaia namonamomu. Spesel painia taudia, misinari taudia, Betele taudia, sekit taudia, bona distrik taudia na Gilead Sikulina ai bae vareai diba, unuseniai bae abia treinin ese baine durudia, tanobada heḡeḡemadai haroro ḡaukarana bae goadalaia.

• Dahaka dainai Painia Sikulina e karaia?

• Daidia be Basileia Evanelia Sikulina baela diba?