Ikhumelo yokhalayi, icikola co Umwene ikhanle ikaruma ni makhalelo ootepa wiithoonya o Masaahiti a Yehova. Ale anlakela uvara nteko woolalyeera ukati mwinci anaalattuliyaka ukela icikola co Umwene wiira yiitthucihiye mananna ‘oovara ratta nteko wo Umwene.’—2 Timotiyu 4:5.

Icikola yo Mapiyoneeru. Piyoneeru owiicaavyerya amalihaka mwaakha mmoca avaraka nteko woolalyeera, naalattuliyaka usoma icikola yo mahuku 6. Itthu yuulupale impheeliya uri unkavihera piyoneeru umwaattamela Yehova, ucuwela ulalyeera sana-saana ni uhihiyerera uvara ntekwaawe.

Icikola Yaanamalalyeera Umwene. Ila icikoleela yo myeeri miili yasomiyaka, itthenkaciye wiira yiitthucihiye mapiyoneeru apacenre khalayi ni alakenle uthama ncoko unkhalaaya wiira arwee ncoko unthwa anamalalyeera. Mapiyoneeru yattharaka ntakihero na Namalalyeera muulupale walaponi, Yesu Kristu, unlikana nuwiira co: “Kiri va! Nkirumeke!” (Isaiya 6:8; Joau 7:29) Ntthu athamelaka ncoko nkhwaawe khanlamuliya urikarikiha makhalelwaawe. Ilema caatthu, iyoolya ni makhalelo o ilapo toko uririya awula uvihaviha, pooti ukhalaka citthu cinvirikana ni nnye caalemalenlyaawe. Ni pooti ukhalaka wiira haana wiitthuca iluuka ikiina. Ila icikoleela inawaakavihera mayamunneehu oothelana, oohithela awula oohitheliya arina myaakha 23 mpaka 65, ukhalana makhalelo oominepani omaana ni ciicammo ukhala namacuwelaca upanka citthucene wiira avareliye nteko ni Yehova ni mphwinkwaawe woothotokana.

Icikola yo Ibiiblya yo uKiliyati. Niiluuka iheperewu “Kiliyati” maanaaya wiira “Mwaako wo Usaahiti”. Ikhumelo itthukuliyaaya mwaakha wo 1943, atthu oopwahaka 8.000 yiitthucihiye ila icikoleela ahoveleelihiya ilapo cikhwaawe wiira akhale mamisiyonaariyu ni avahe usaahiti “mpaka wuumaleloni ilapo,” ni uyo ntekooyo uneera waakhalelaka saana. (Miteko 13:47) Ukati mamisiyonaariyu waaveleelihiyaaya ilapo yo Peru, khanaarivo nloko iyo ilapweeyo. Ilelo ahaawo maloko oopwahaka 1.000. Uwakati waapacenryaaya ulalyeera u Japão, Masaahiti a Yehova yaarivo khayaaphiile 10. Masi ilelo ahaawo Masaahiti a Yehova oopwahaka 200.000. Icikola yo uKiliyati cinviraka myeeri 5 isomiyaka, ni ninaasomiya Nuulumo na Nluku sana-saana. Mapiyoneeru owiivaherera, mamisiyonaariyu, ale ankhala uPeteli awula mamootoli o isirikwiitu, pooti wanlattuliyaaya urwaa usoma ila icikoleela, wiira ulipihere ni ukhomaalihe nteko woolalyeera unvariya ilapo yotheene.

• Nlattuni untthenkaciyaaya Icikola yo Mapiyoneeru?

• Tipani nothanliya urwaa usoma Icikola Yaanamalalyeera o Umwene?