Ожнысек Иегова шке таныкше-влакым эре туныктен. Тачат Иегован Таныкше-влак тунемыт. Улыт тыгай иза-ака-влак, кӧмыт Кугыжаныш нерген уверым шаркалымаште утларак жапым пуэн кертыт. Нунылан посна туныктымаш пуалтеш. Тыгай туныктымашлан кӧра нуно поро уверым шарыме пашам тичмашын шуктен кертыт (2 Тимофейлан 4:5).

Пионер-влаклан школ. 70 шагатым таныклыше пионерым, ик ийым служитлымекыже, 6 кечылан тунемаш ӱжыт. Туныктымаш верысе Вашлиймаш залыште эртаралтын кертеш. Тиде школ пионерлан Иегова дене лишылрак лияш, чыла шотыштат служитлымаш мастарлыкшым саемдаш да ӱшанле служитлыше лийын кодаш полша.

Кугыжанышын увертарышыж-влаклан школ. Тыгай школышто 2 тылзе жапыште опытан пионер-влакым туныктат. Тунемаш ӱжыт нуным, кӧмыт тушко каяш ямде улыт, кушто полыш кӱлеш. Нуно пуйто ойлат: «Теве мый! Мыйым колто!» Нуно Иисус Христос дечын примерым налыт. Вет тудат мландыш поро уверым увертараш толын да тиде пашам ыштымаште эн сай примерым коден (Исаия 6:8; Иоаннын 7:29). Кӧмыт вес верыш илаш куснат, простанрак илаш тунемаш ямде лийшаш улыт. Верысе культур, климат да кочкыш шочмо кундемысе деч чот ойыртемалтын кертеш. Южыштлан у йылмым тунемаш верештеш. Тиде школыш ешдыме иза-акам да тыгак еш мужыр-влакым тунемаш ӱжыт. Нунын ийготышт 23 гыч 65 ий марте лийшаш. Школ Юмылан келшыше да служымаш пашаште кӱлешан койыш-влакым вияҥдаш полша. А эше нуным тушто у мастарлыклан туныктат. Тидлан кӧра Иегова нуным сайрак кучылтын кертеш.

Орол Башньын Галаад манме библейский школ. Еврей йылме дене «Галаад» мут «таныклыше» манмым ончыкта. Галаад школышто 1943-шо ий гыч туныкташ тӱҥалыныт. 8 000 утла еҥ, тиде школым тунем пытарымеке, «тӱня тӱр марте» таныклаш манын, миссионер семын служитлаш колтымо лийыныт (Апост. пашашт 13:47). Тиде сай саскам конден. Мутлан, Перу элыште тыге лийын: миссионер-влакын толмышт деч ончыч тушто ик погынымашат лийын огыл, а кызыт 1 000 утла! Кунам миссионер-влак Японийыште служитлаш тӱҥалыныт, тушто 10 Танык гына лийын, а кызыт 200 000 утла. Галаад школышто 5 тылзым тунемыт. Тунемше-влак Юмын Мутшым келгын шымлат. Тунемаш кӧм ӱжыт? Специальный пионерым, таныклымаш пашам шуктышо миссионерым, филиалыште пашам ыштыше иза-акам да районым эскерыше иза-влакым. Нуно келге библийысе туныктымашым налыт да вара уло тӱнямбалне ыштыме пашанам вияҥдаш полшат.

• Пионер-влаклан школын цельже могай?

• Кугыжанышын увертарышыж-влаклан школышто кӧ тунемеш?