Tunde ku laza ku longesa via Vuangana ca pua cipanga ca seho ku Vakaleho va Yehova. Vose va lihana mu cipanga ca ku ambulula Vuangana ntsimbu yose, ve ku hita mu visikola via ku lifuila linga va hase ku “puisamo vipanga” viavo via ku ambulula.​—Yoano 7:29.

Sikola ya Vipanga via Vupioneiro. Omo pioneiro ua ntsimbu yose ue ku puisa muaka umo, ve ku mu tuma ku sikola ya matangua 6, ye ku hitila mu Ndzivo ya Vuangana. Vutumbe vuayo ku kuasa pioneiro ku likuata vusamba vua kama na Yehova, ku kala na vutongue mu vifua via ku liseza-seza via ku ambulula, kaha na ku tualelelaho cipanga cavo.

Sikola ya Vakua ku Ambulula Vuangana. Eyi sikola ya vingonde vivali va i pangela ku longesa vapioneiro va vutongue, vaze va tava ku seza membo avo na ku ka pangela kuose ku tondeka vukuasi vuavo. Ci na pu ngue ve ku handeka nguavo: “Yange uno; nji tume ange,” mu ku tambuluisa mukua ku Ambulula ua Kama ua kele ha mavu Yesu Kilistu. (Isaya 6:8; Yoano 7:29) Ku ka kala ku laako na kuimbo ce ku tondeka ku yoya muono ua uasi. Cisemua, cifua ca ntsimbu, na via-ku-lia vi hasa ku liseza na vize vi uezilila. Vintsimbu vimo ce ku tondeka naua ku lilongesa lilimi lieka. Eyi sikola ye ku kuasa vamuanetu va vamala na vampuevo, na vaze va liambata, va miaka 23 ku tuala 65, va kale na vifua via mu lutsilielo via tondeka mu cipanga cavo. Kaha ve ku lilongesako naua vutongue vua tondeka linga Yehova a va pangese mu vutuntu ku hitila mu lukungulukilo lueni.

Sikola ya Ngileande. Lizi “Ngileande” mu ciHevelu lia lomboloka “Mutumbo ua Vukaleho.” Tunde ha va i tumbikila mu 1943, sikola ya Ngileande i na longesa vaMisionaliu va tuvakana 8.000 na ku va tuma “kua lenga mavu” linga va ka ambulule. (Vilinga 13:47) Ca ku muenako, ku cifuti ca Peru, tele ka kua kele cikungulukilo vunoni fume ha va hetelako vaMisionaliu kuli vikungulukilo vi tuvakana 1.000. Kaha ku Japão kua kele lika likumi lia Vakaleho vunoni mu va tumako vaMisionaliu kuli honi Vakaleho va Yehova va ku pua 200.000. Eyi sikola ya vingonde vitanu ye ku longesa vilongesa via lova via mu Mbimbiliya. Vapioneiro va ku lifuila, vamisionaliu, vakua mbetele, ni tuniungi va ku zinguluka vakevo va ve ku lania ku sikola yaco va ka va viukisile mu vutuntu linga va kaniamese cipanga cetu mu mavu ose.

• Vutumbe vua Sikola ya Vipanga via Vupioneiro vuka?

• Sikola ya Vakua ku Ambulula Vuangana va i pangela veya?