Itaixpantijkauan Jiova nochipa kiselianij tamachtilis ika Biblia. Akin senkis kitayekanaltiaj itekiyo Dios kiseliaj se tamachtilis tein kinpaleuia maj okachi uelikan kiyekchiuakan inintanojnotsalis (2 Timoteo 4:5).

Tamachtilis tein kiselia akin Tekiti kemej Precursor. Keman aksa kiajxitia se xiuit itech nejin tekit, kiselia se tamachtilis tein uejkaua chikuasen tonal uan uelis mochiuas itech se Kali kampa tiMosentiliaj tein amo uejka moajsis. Nejin tamachtilis kipaleuis maj okachi motoki iuan Jiova, maj okachi kuali kichiua itekiyo Dios uan maj kisentoka itech nejon tekit.

Tamachtilis tein kiseliaj akin kiteixmatiltiaj iTekiuajyo Dios. Nejin tamachtilis tein uejkaua ome metsti, kiixtalijkej maj kinpaleui akin kichiuaj tekit kemej precursor uan kiuikajya seki xiujmej itech nejon tekit, akin ika miak pakilis uelis yaskej itech okse xolal uan tapaleuiskej kampa okachi monekis. Tein melauj, yejuan kijtouaj: “¡Nikan niyetok nejua! Xinechtitani nejua”, ijkon kemej Jesucristo, akin moixmatik kemej okachi ueyi tanojnotskej nikan taltikpak (Isaías 6:8; Juan 7:29). Ijkuak yaskej tapaleuitiuij uejka, kemansa monekis amo kipiaskej miak taman. Xolal kampa ajsiskej uelis yeski taman kemej nemij, xa tel tonas oso taseseyas uan takual amo kemej yejuan momattoyaj kikuaskej. Xa hasta monekis momachtiskej se yankuik tajtol. Nejin tamachtilis kinpaleuia tokniuan siuamej uan takamej akin ininselti ijkon kemej tokniuan namikuanij, tein kipiaj 23 hasta 65 xiujmej, maj kinextikan kualneskayomej tein kinpaleuis kampa kintitaniskej maj tapaleuitij uan no maj uelikan kichiuakan tekimej tein kinpaleuis maj okachi kuali kitekitilikan Jiova uan inechikol.

Galaad—Tamachtilis ika Biblia tein kitemakaj iTaixpantijkauan Jiova. Galaad itech tajtol hebreo kijtosneki “tenepan tein kiteixmatiltia teisa”. Peuak itech xiuit 1943, uan panoua ocho mil kintitaninij maj kichiuakan tekit kemej misionero itech “nochi senmanauak” taltikpak uan kuali kisani nejon tekit (Hechos 13:47). Keman akin yekinika kichiuayaj tekit kemej misionero ajsikej itech altepet Perú, amo onkaya nion se nechikol; axkan moajsijya panoua mil nechikolmej. Keman oksekin ajsikej itech altepet Japón, amo ajsiaj nion majtakti itaixpantijkauan Jiova; axkan panoua doscientos mil. Tamachtilis tein motemaka Galaad tein uejkaua makuil metsti kinpaleuia momachtianij maj kiajsikamatikan ika nejmachkayot iTajtol Dios. Akin kichiuaj tekit kemej precursor especial, akin tapaleuijtokej itech okse altepet kemej misioneros, akin tekitij itech kalmej Betel oso kemej takalpanouanij, uelis kinyoleuaskej maj kiselikan nejin tamachtilis tein kinpaleuis maj tapaleuikan maj okachi kuali motanojnotsa semanauak taltikpak.

• ¿Keniuj tapaleuia Tamachtilis tein kiseliaj akin kichiuaj Tekit kemej Precursor?

• ¿Akonimej uelis yaskej itech Tamachtilis tein kiseliaj akin kiteixmatiltiaj iTekiuajyo Dios?