Banda gã ko, ando hĩnga Atɛmwɛ tɛ Yehova na awangɔ ti Teokrasi. Alɛkɛ akalasi mɛ nzɔ̃ni na ndombali azi mɛ ndo hɛ ngoi tɛ la zu na lo ti kwa ti hangɔ Lo-lengɔ Gbia ti ya ko ‘ala likwa tɛ la na seni.’​—2 Timɔte 4:5.

Kalasi tɛ awa sungɔ lége. Wa sungɔ lége ko la ali kwa ni na pɛ buru kɔi ko, lo lengbi ti lingɔ kalasi niko bi mana, ngoi mɛ ndɛ ka ya Da Lo-lengɔ Gbia mɛ dã na lo. Nda kalasi niko adu ti zangɔ wa sungɔ lége ya lo ti dã na Yehova, lo ti kpengbani ka ya akwa zu ti fangɔ tɛnɛ, ko lo ngba nga lá kwɛ́ na kwa ti fangɔ tɛnɛ.

Kalasi tɛ Awa fangɔ tɛnɛ ti Lo-lengɔ Gbia. Alɛkɛ kalasi niko ti nzɛ sɛ na lo tɛ awa sungɔ lége mɛ aninga ka ya kwa ni mɛ ala ye lingɔ kwa ka ndo mɛ azi na gwɛ̃ tɛ awa fangɔ tɛnɛ. Ali ma bere, ala pa ya “Mbi lo mɛ! To mbi!” ma se tɛ Yezo Kristo, kota wa fangɔ tɛnɛ mɛ ta zo mɛ ndɛ adɛ lengbi na lo ma. (Yisaya 6:8; Yoane 7:29) Gwengɔ ka ndo mɛ ndɛ ndo hũnda ya ta zo ni adu zo ti nzangɔlɔ ma. Se dú, dé, bere gbingɔ, nga na atɛ ti tɛngɔ alengbi ti ɔngbingɔ na omɛ ndó mɔ na ni uzu. Na hũndangɔ ya mɔ manda yanga ti fanani. Kalasi niko ndo za ayata mɛ ta ala dɛ du na kɔli bere wali ma, ndo za ala mɛ ka due, mɛ na buru 23 tee 65, ya ala dũ hale tɛ wa Kristo mɛ na zangɔ la ka ndo mɛ na tongɔ na ala nga na ye mɛ na lingɔ ya Yehova to ala na kwa, ko linɔ tɛ Yehova to nga ala na kwa.

Gileadɛ, Kalasi tɛ watchtower ti mandangɔ Ngbangɔ. Na yanga ti Hebre, “Gileadɛ” alengbi ya “Gba ti Tɛmwɛ.” Banda ko ndó la asi na Gileadɛ na 1943 ko, ato amisiɔnɛrɛ 8 000 mɛ a onzi kalasi niko ya ala ha nda lo “ngbĩi ka nda sese gbɔ” ko kwa ni ahɛ lé gba. (Awa Pangɔ Kwa 13:47) Ngoi mɛ ndó akɔzo amisiɔnɛrɛ asi ka Pérou ko, ta bombi kɔi ndó ka ya kɔdɔrɔ ni ma. Kanda na olo ko abombi asi da a ɔ 1 000. Ngoi ko ndó amisiɔnɛrɛ tɛ e asi ka Japon ko, ta Atɛmwɛ atindó sui kɔi ka ya kɔdɔrɔ ni ma. Kanda na olo ko ala ɔ 200 000. Kalasi niko ti Gileadɛ ndo li nzɛ kɔ̃ ti mandangɔ nda tɛnɛ tɛ Nzapa pii nvɛ̃ni. Ala ko na olo mɛ adu awa sungɔ lége ti kotani bere amisiɔnɛrɛ, ndo li kwa ka biro ti filialɛ, awa bangɔ ndó kɛlɛ kɛlɛ la ndo ili ala ka kalasi niko ya ala lwa fɔrmasiɔ ti zangɔ nga na kpengbangɔ na kwa tɛ Nzapa ge lɛ sese zu.

• Nda Kalasi tɛ awa sungɔ lége la nɛ?

• Alɛkɛ Kalasi tɛ Awa fangɔ tɛnɛ ti Lo-lengɔ Gbia na lo tɛ ana?