Abajurizi ba Yehova batwire baine amashomero agu barikutendekyerwamu. Hariho amashomero g’omutaano ahabw’abo abarikwehayo kumara obwire bwingi barikubuurira kugira ngu babaase kuhikiiririza kimwe ‘okuheereza kwabo.’—2 Timoseo 4:5.

Eishomero rya Baapayoniya. Omubuurizi ku arikumara omwaka gumwe ari payoniya, naayetwa kuza omu ishomero ry’ebiro mukaaga aha Kyombeko ky’Obukama ekimuri haihi. Eishomero eri nirimuhwera kwirira haihi Yehova, kwongyera kubuurira gye, n’okuguma ari omwesigwa omu buheereza bwe.

Eishomero ry’Ababuurizi b’Obukama. Eishomero eri eririkumara ameezi abiri ritebeekanisiibwe kutendeka baapayoniya abarikubaasa kuza kubuurira omu bicweka ahu ababuurizi barikwetengwa munonga. Nibaba nibagira ngu “Ndi aha; ba niinye waatuma” barikutooreza omubuurizi orikukirayo, Yesu Kristo. (Isaaya 6:8; Yohaana 7:29) Okuza hare n’omu ka nikibaasa kukwetengyesa okukora empindahinduka okuguma noomarwa na bikye. Embeera, ebyokurya nibibaasa kuba nibitaana aha bi omanyireire. Nikibaasa kwetengyesa kwega orurimi rusya. Eishomero eri nirihwera ab’eishe-emwe abatakataahire omu bushwere hamwe n’abo abashweraine abari ahagati y’emyaka 23 na 65, kugira emitwarize mirungi ei barikwetenga omu buheereza bwabo kandi bakongyera kukoresibwa Yehova n’ekibiina kye.

Eishomero rya Gileadi. Omu Ruheburaayo ekigambo “Gileadi” kiine akakwate n’okuha “Obujurizi.” Okuruga omuri 1943, obu eishomero eri ryatandika, abamiisani abarikurenga ahari 8,000 abatendekiirwe omu eishomero eryo, boohereziibwe omu mahanga maingi kandi baatunga ebirungi. (Ebyakozirwe 13:47) Obu abamiisani baabanza kuza omuri Peru, hakaba hatariyo bibiina by’Abajurizi ba Yehova, kwonka hati hariyo ebibiina ebirikurenga 1,000. Obu baatandika kuheereza omuri Japan, hakaba hariyo Abajurizi ba Yehova abatarikuhika ikumi, kwonka hati nibarenga 200,000. Omu meezi ataano okutendekwa oku nikutwariramu okwega Ekigambo kya Ruhanga. Baapayoniya ab’obutwire, abamiisani, abarikuheereza aha ofiisi y’eitaagi hamwe n’abareeberezi abarikutaayaayira ebibiina nibeetwa omu ishomero eri kutendekwa, kubaasa kubahwera kuhama kandi bakeeyongyera kubuurira gye.

• Eishomero rya baapayoniya ririho ahabwa kigyendererwa ki?

• Eishomero ry’Ababuurizi b’Obukama rigyendereire kuhwera baahi?