Ɔvi mekɛ tendenle, teokelase ndetelɛ ɛyɛ debie titili ɛmaa Gyihova Alasevolɛ. Bɛyɛ sukulu titili bɛmaa menli mɔɔ fa bɛ mekɛ kɔsɔɔti yɛ Belemgbunlililɛ edwɛkɛhanlɛ gyima ne la amaa bɛahola bɛayɛ bɛ “ɛzonlenlɛ gyima ne kpalɛ.”​—2 Timote 4:5.

Adekpakyelɛma Ɛzonlenlɛ Sukulu. Saa dahuu adekpakyelɛnli yɛ gyima ɛvolɛ ko wie a, bɛmaa ɔkɔ sukulu mɔɔ bɛfa kenle nsia bɛyɛ la bie wɔ Belemgbunlililɛ Asalo mɔɔ bikye ye la anu. Ye bodane a le kɛ ɔboa adekpakyelɛnli ne amaa yeabikye Gyihova, yeabɔ mɔdenle wɔ ɛzonlenlɛ gyima ne foa biala anu na yeahɔ zo yeava nɔhalɛlilɛ yeayɛ ye gyima ne.

Belemgbunlililɛ Edwɛkpakavolɛma Sukulu. Bɛyɛ sukulu ɛhye mɔɔ bɛfa siane nwiɔ bɛyɛ la kɛ bɛfa bɛatete adekpakyelɛma mɔɔ lɛ anwubielɛ na bɛlɛ ɛhulolɛ kɛ bɛbavi bɛ sua zo bɛahɔyɛ gyima wɔ ɛleka mɔɔ bɛhyia bɛ moalɛ la. Bɛka kɛ, “Mewɔ ɛke! Soa me!” bɛfa bɛsukoa Gyisɛse Kelaese, Edwɛkpakavolɛ mɔɔ tɛla biala mɔɔ zonlenle wɔ azɛlɛ ye azo la. (Ayezaya 6:8; Dwɔn 7:29) Kɛmɔ bɛkɔ ɛleka mɔɔ wale la ati, bɛmkpondɛ ninyɛne mgbole. Bie a ɛkɛ ne amaamuo, kɛzi maanle nu de nee aleɛ bayɛ ngakyile avi ɛleka mɔɔ ɛnee bɛwɔ la ɛdeɛ ne anwo. Bie a ɔbahyia kɛ bɛsukoa aneɛ fofolɛ. Sukulu ɛhye boa mediema mrenyia nee mraalɛ mɔɔ bɛtɛgyale nee agyalɛma mɔɔ ɛli ɛvolɛ 23 kɔdwu 65 la ɔmaa bɛnyia Kilisiene subane mɔɔ bɛbahyia nwo nee ninyɛne mɔɔ baboa bɛ yeamaa Gyihova nee ye ahyehyɛdeɛ ne ava bɛ ali gyima kpalɛ la.

Ɛzinzalɛ Arane Geleade Baebolo Sukulu. Wɔ Hibulu nu, “Geleade” kile “Alasevolɛ Dɔɔnwo.” Sumunli kɛ bɛbɔle ɔ bo wɔ 1943 la, bɛva menli mɔɔ bo 8,000 mɔɔ bɛwie la bɛhɔ ɛleka ngakyile kɛ edwɛkpatɛlɛvolɛma, kɛ bɛhɔli daselɛ wɔ “azɛlɛ ye azo ɛleka biala,” na debie kpalɛ vi nu ɛra. (Gyima ne 13:47) Mekɛ mɔɔ limoa mɔɔ menli ɛhye mɔ bie hɔle Peru la, ɛnee asafo biala ɛnle maanle ne anu. Noko kɛkala, asafo mɔɔ bo 1,000 la wɔ ɛkɛ. Mekɛ mɔɔ edwɛkpatɛlɛvolɛma bɔle ɔ bo kɛ bɛsonle wɔ Japan la, ɛnee Alasevolɛ mɔɔ wɔ maanle ne anu la ɛndwu bulu. Kɛkala, bɛbo 200,000. Siane nnu ne mɔɔ bɛfa bɛyɛ Geleade sukulu ne la maa bɛsukoa Nyamenle Edwɛkɛ ne kpalɛ. Bɛto ɛsalɛ bɛfɛlɛ adekpakyelɛ titilima, edwɛkpatɛlɛvolɛma, menli mɔɔ yɛ gyima wɔ ɔfese ngakyile ne mɔ anu la anzɛɛ maangyebakyi zo neavolɛma bɛmaa bɛkɔ sukulu ɛhye na bɛtete bɛ kpalɛ amaa ewiade amuala gyima ne ahɔ zo.

• Adekpakyelɛma Ɛzonlenlɛ Sukulu ne bodane a le duzu?

• Nwane mɔ a kɔ Belemgbunlililɛ Edwɛkpakavolɛma Sukulu ne a?