Jehova Sei Witnesses henn noch immah boviaht so feel lanna funn di Bivvel es si kenna. Es sinn sirtendi shoola fa selli es en latt zeit shpenda in di ministry. Sell helft si fa bessah sei in iahra ministry.​—2 Timotheus 4:5.

Peiyneer Shool. Vann ebbah moll en peiyneer voah fa’n yoah, vadda si kaysa zu en shool es sex dawk lang is. ’Sis fleicht an en Fasamling Blatz nayksht vo si voona. Dee shool helft si naychah kumma zu Jehova so’s si ohhalda kenna een deena, un’s helft si bessah vadda in di ministry.

Shool fa Kingdom Evangelizers. Dee shool is zvay moonet lang. ’Sis fa peiyneers trayna es en latt experience henn un es willing sinn fa moofa un helfa in en anrah area. In en vayk, sawwa si, “Do binn ich. Shikk mich!” Sell is vass da Jesus gedu hott, da besht teacher es selayva uf di eaht voah. (Jesoiya 6:8; Johannes 7:29) Fa veit vekk zeeya funn haym maynd fleicht zufridda sei mitt vennichah es ma gegvaynd voah. Da culture, ’s veddah, un’s ess-sach mecht aw gans diffand sei. Es mecht even nohtvendich sei fa en anri language lanna. Dee shool helft couples un leit es single sinn es zvishich 23 un 65 sinn fa shaffa uf di spiritual qualities es si braucha vo-evvah es si anna gayn. Un’s helft si able sei fa may du fa Jehova un sei organization.

Watchtower Bible School of Gilead. In Hebrew, “Gilead” maynd en “Witness Haufa.” Ever siddah es Gilead kshteaht hott, sinn’s may es acht dausend leit deich dee shool ganga. Si voahra naus kshikt fa missionaries sei un doon en witness gevva gans ivvah “di eaht.” (Apostelgeschichte 13:47) Vann samm funn selli seahsht zu Peru kumma sinn, voahra’s kenn congregations. Nau sinn’s ivvah en dausend. Vann missionaries kshteaht henn zu Japan gay, voahra’s nett even zeyya Witnesses in selli country. Nau sinn’s ivvah zvay hunnaht dausend. Deich di fimf moonet in di shool doon si en deefah shtoddi funn di Bivvel. Selli es kaysa vadda, sinn special peiyneers, missionaries, circuit overseers, adda selli es an branch offices shaffa. Si vadda goot getraynd fa helfa un support gevva zu di eahvet es gedu vatt gans ivvah di veld.

• Favass henn miah en Peiyneer Shool?

• Veah kann zu di shool gay fa Kingdom Evangelizers?