Jehova siene Zeijen sent noch emma doarom todoonen jewast, daut see fa äaren Deenst goot utjelieet wieren. Doawäajen hab wie fa deejanje, waut äare gaunze Tiet toom prädjen brucken, besondre Schoolen oppjestalt, waut dee halpen, äaren Deenst noch bäta to doonen (2. Timotäus 4:5).

Pioniadeenst-School. Wan eena ieescht een Joa es Pionia jewast, dan woat eena fa dise School enjelot. Dee dieet sas Doag un woat jeweenlich en een Vesaumlungshus aufjehoolen, waut nich too wiet auf es. De School es doatoo, daut de Pionieren Jehova noda komen, sikj en aule Stekjen em Deenst vebätren un äaren Deenst tru wiedamoaken kjennen.

School fa Kjennichrikjsvekjindja. Dise School dieet twee Moonat. Dee es fa erfoarne Pionieren von 23 bat 65 Joa, waut reed sent, doa hantotrakjen, wua mea Help fält. Daut kjennen onbefriede Breeda ooda Sestren sennen ooda uk Lied. Dee sent aula soo jesonnen, aus daut en Jesaja 6:8 sajcht: “Ekj sie hia. Du kaust mie schekjen.” Opp dee Wajch doonen dee Jesus Christus no, dän basten Liera, waut daut oppe Ieed jejäft haft (Johanes 7:29). Wan dee wiet wajchtrakjen, motten dee veleicht met weinja tofräd sennen, sikj to een aundret Wada ooda Äten wanen un de Menschen doa haben daut veleicht gaunz aundasch, aus see daut jewant sent. Eenjemol motten dee uk eene aundre Sproak lieren. Dise School moakt dee em jeisteljen reed fa äare Oppgowen un lieet dee, woo see noch bäta kjennen met Jehova un siene Organisazion toopschaufen.

Gilead-Bibelschool fa Missionoaren. Daut hebräische Wuat fa “Gilead” haft met Zeichnis jäwen to doonen. Dise School wort aune 1943 oppjestalt, un aul mea aus 8 000 von Jehova siene Zeijen sent dee derchjegonen un haben aus Missionoaren “äwa de gaunze Welt” kunt väl Zeichnis jäwen (Aposteljeschicht 13:47). Aus biejlikj de ieeschte Missionoaren no Peru kjeemen, wia doa noch kjeene Vesaumlunk. Nu sent doa aul een Enj äwa dusent. Aus de ieeschte Missionoaren no Jaupaun kjeemen, jeef daut doa nich mol tieen von Jehova siene Zeijen. Nu sent doa aul mea aus 200 000 Stekj. Bie dise School, waut fief Moonat dieet, woat Gott sien Wuat utem Grunt studieet, un doa woat uk jelieet, woo eena daut Woakj oppe gaunze Welt unjastetten un veraunbrinjen kaun. Daut eena fa de Gilead-School enjelot woat, mott eena ieescht Sondapionia, Missionoa ooda Kjreisoppsechta sennen ooda en eent von Jehova siene Zeijen äare Offizen deenen.

• Fa waut es de Pioniadeenst-School?

• Fa wäm es de School fa Kjennichrikjsvekjindja?