ساڈی تنظیم دی شروع توں ای ایہہ خاصیت رہی اے کہ ایہہ سانوں بادشاہی دا پیغام پھیلاؤن لئی چنگی تربیت دیندی اے۔‏ پہل‌کاراں دی تربیت لئی خاص سکولاں دا انتظام کیتا گیا اے تاکہ اوہ چنگی طرحاں بادشاہی دی مُنادی کر سکن۔‏—‏2-‏تیمُتھیُس 4:‏5‏۔‏

پہل‌کاراں لئی سکول۔‏ پہل‌کاراں نُوں اِک سال خدمت کرن توں بعد ایس سکول چوں تربیت پاؤن دا موقع مِلدا اے۔‏ ایہہ سکول چھ دن دا ہوندا اے تے ایہدا انتظام ساڈی کسے عبادت‌گاہ وچ کیتا جاندا اے۔‏ ایہدے ذریعے پہل‌کاراں دی مدد ہوندی اے کہ اوہ یہوواہ خدا نال اپنا رشتہ ہور مضبوط کرن،‏ فرق فرق طریقیاں نال مُنادی کرنا سکھن تے وفاداری نال خدمت کردے رہن۔‏

بادشاہی دے مناداں لئی سکول۔‏ ایہہ سکول دو مہینیاں لئی ہوندا اے۔‏ ایہدے وچ تجربےکار پہل‌کاراں نُوں تربیت دِتی جاندی اے۔‏ ایہہ پہل‌کار اپنا گھر بار چھڈ کے ایسیاں تھانواں تے جان لئی تیار ہوندے نیں جِتھے بادشاہی دی مُنادی کرن والیاں دی زیادہ لوڑ ہوندی اے۔‏ اصل وچ اوہ یسعیاہ نبی وانگوں کہہ رہے ہوندے نیں کہ میں حاضر آں مینوں گھل۔‏ ایس طرحاں اوہ سب توں وڈے مناد یسوع مسیح ورگا جذبہ ظاہر کردے نیں۔‏ (‏یسعیاہ 6:‏8؛‏ یوحنا 7:‏29‏)‏ دُوجے علاقیاں وچ جا کے اوہناں نُوں بڑی سادہ زندگی گزارنی پے سکدی اے۔‏ اوتھوں دی ثقافت،‏ کھانا پینا تے موسم اوہناں دے اپنے علاقے توں بالکل فرق ہو سکدا اے یاں فیر اوہناں نُوں کوئی نویں زبان سکھنی پے سکدی اے۔‏ ایس سکول وچ 23 توں 65 سال دے کنوارے مبشر تے ویائے جوڑے جا سکدے نیں۔‏ ایس سکول دے ذریعے اوہناں وچ ایسیاں صفتاں پیدا ہوندیاں نیں جیہڑ‌یاں خدا دی خدمت وچ اوہناں دے بڑے کم آؤندیاں نیں۔‏ ایس طرحاں اوہ یہوواہ خدا تے اوہدی تنظیم وَلوں مِلن والیاں ذمےداریاں نُوں ہور چنگی طرحاں نبھاؤن دے قابل ہو جاندے نیں۔‏

واچ‌ٹاور بائبل سکول آف گلئیڈ۔‏ گلئیڈ عبرانی زبان دا لفظ اے جدا مطلب اے،‏ ”‏گواہی دا ڈھیر۔‏“‏ ایس سکول دی شروعات 1943ء وچ ہوئی۔‏ ہُن تک ایہدے ذریعے اَٹھ ہزار توں زیادہ مشنریاں نُوں تربیت دِتی گئی اے۔‏ اوہناں نُوں زمین دے کونے کونے تک گواہی دین لئی گھلیا گیا اے تے اوہناں دا ایہہ کم بڑا کامیاب رہیا اے۔‏ (‏اعمال 13:‏47‏)‏ مثال لئی جدوں مشنری پہلی وار مُلک پیرو گئے تے اوتھے کوئی کلیسیا نئیں سی۔‏ پر ہُن اوتھے اِک ہزار توں زیادہ کلیسیاواں نیں۔‏ جدوں ساڈے مشنریاں نے پہلی وار جاپان وچ قدم رکھیا تے اوتھے دس توں وی گھٹ یہوواہ دے گواہ سن۔‏ پر اَج اوتھے دو لکھ توں زیادہ یہوواہ دے گواہ نیں۔‏ گلئیڈ سکول وچ پنج مہینیاں لئی خدا دے کلام چوں بڑی گہرائی نال تلیم دِتی جاندی اے۔‏ ایس سکول وچ خصوصی پہل‌کاراں،‏ مشنریاں،‏ یاں حلقے دے نگہباناں نُوں سدیا جاندا اے۔‏ اوہ ایس سکول توں شاندار تربیت پا کے اپنی اپنی کلیسیا نُوں حوصلہ تے مدد دے سکدے نیں تے دُنیا بھر وچ ساڈے کم نُوں اَگے ودھا سکدے نیں۔‏

• پہل‌کاراں لئی سکول دا مقصد کیہہ اے؟‏

• بادشاہی دے مناداں لئی سکول وچ کِنہاں نُوں تربیت دِتی جاندی اے؟‏