Jehóvap testigusnínpaj, unaymantapacha, Bibliát estudiayta ancha importante can. Chayraycu cursus Bibliamanta chasquincu picunaslla ashca tiempút predicancu. Chayna predicaciunnincuta astaan allít ’ruáypaj preparasckas cancu (2 Timoteo 4:5).

Escuela Alli Precursores Cáypaj. Suj cursu shojta (6) punchausmanta can precursoréspaj y ’ruacuyta atin suj Huasipi tantacunasmanta Jehóvap testigusninmanta ima ckaylla tían. Cháypaj suj huata precursor ina apinan tían. Cá cursu yanapácoj ’rin Jehovaman astaan ckayllanchacunancúpaj, alli predicajcuna canancúpaj y animacun precursores fieles ina seguinancúpaj.

Escuela Predicajcunápaj Reinumanta. Suj cursu íshcay mesesmanta can ckaríspaj, huarmíspaj y casarasckáspaj. Cháypaj 23 hasta 65 huatas apinancu tían, precursor esperienciáyoj canancu tían y dispuestus tianancu tían ’ríypaj mayman ashca yanapa precisacun. Jishu cara astaan atun Predícaj ima Ashpapi causara, payta yachapias, nincu: «¡Caypi nocka tiani! Nockata cacháay» (Isaías 6:8; Juan 7:29). Áicap mósoj lugarman ’rincu acostumbracunancu tían suj laya causayta y costumbres, ashca chiris, ashca ’rúpay, sinchi huairas y micunas mana quiquin cayta atin. Quisas suj mósoj ckallu aprendenancu tían. Cá cursupi cualidares espirituales apiyta apréndej ’rincu ima yanapácoj ’rin maypi síruej ’rincu. Yachachisckas cancu, Jehovát y paypa organisaciunninta astaan yanapanancúpaj.

Escuela Galaadmanta. Galaad hebreopi niyta munan «ashca ’rumis amontonasckas ima testimoniúpaj siruincu». Cá cursu pishca (5) mesesmanta can y ckallarera 1943 huatapi. Chá huatamanta ñauckeman astaan 8.000 huauckes y panas misionerus ina llojserancu, ashca lausman predicáypaj (Hechos 13:47). Ejemplu, áicap huámaj misionerus Perupi chayarancu, ni suj congregaciun tiara. Cunan astaan 1.300 congregaciunes cancu. Áicap Japonpi chayarancu mana ni 10 testigus carancu. Cunan astaan 200.000 cancu. Cá cursupi Yáyap ’Rimayninta allít estudiacun y estudiajcuna preparaciunta chasquincu yanapanancúpaj predicaciun ñauckeman seguinánpaj y túcuy layas persunasmanta alli noticiasta uyarinancúpaj. Invitacun precursoresta túcuy tiempu ima predicancu, misionerusta ima predicashcancu, picunasta congregaciunesta visitancu o picunastas sucursalespi siruishcancu.

• ¿Mayckan can propositun Escuélap Alli Precursores Cáypaj?

• ¿Picunas ’riyta atincu Escuelaman Predicajcunápaj Reinumanta?