Le Jehovaskere svedki pes rado školinen. Prekal ola, so služinen le Devleske cale časoha, hin pripravimen teokraticko sikaviben: Kaj te [dokončinen] mište peskeri buťi. (2. Timoteoske 4:5 NZ)

E škola prekal e prjekopňicko služba. Adi škola hin 6 ďives andro kher, kaj pes zdžan le Jehovaskere svedki. Hiňi prekal o praviďelna prjekopňika, so avka služinen asi jekh berš. Pomožinel lenge te el pašeder ko Jehovas, feder te zvestinel a te služinel verňe dureder.

E škola prekal ola, so zvestinen pal o kraľišagos. Adi škola ľikerel 2 čhon. Hiňi prekal o skusena prjekopňika, so rado džana te bešel avrether, kaj ode te pomožinen. Phenen: Ade som, bičhav man! Avka napodobňinen le Ježiš Kristus, le nekbareder zvestovaťeľis. (Izaiáš 6:8; Ján 7:29) Ola, so kamen avka te služinel, mušinen te dživel jednoduchones. E kultura, o počasje the o chaben šaj el aver sar khere. Možno pes mušinen te sikavel aver čhib. Pre adi škola šaj džan ola, kaske hin 23 dži o 65 berš, slobodna phrala the pheňa abo manželska pari. Sikaven pes ode te el feder kresťana a te kerel dojekh buťi avka, kaj te en buter užitočna prekal o Jehovas the leskeri organizacija.

Biblicko škola Gilead. Židoviko lav Gilead šaj znameňinel: Te budinel e kopa le barendar, kaj te svedčinen, hoj pes vareso ačhiľa. Adi škola hiňi le beršestar 1943. Dži adaďives pes ode sikade avri buter sar 8000 misijonara, so sas bičhade, kaj te svedčinen čiže te služinen andre aver krajini: Dži andro posledno agor la phuvake. (Skutki 13:47 NZ) Sar avle perša misijonara andro Peru, na sas ode aňi jekh zboros. Akana ode hin buter sar 1000 zbori! Sar avle andre Japonsko, na sas ode aňi 10 zvestovaťeľa. Akana hin ode buter sar 200 000! E škola Gilead ľikerel 5 čhon a študinel pes ode thiš savore kapitoli andal e Biblija. Hine ode vičimen o zvlaštna prjekopňika, o misijonara, o beteliťi the o krajska služobňika, kaj te džanen feder te pomožinel a te del zor, kajča kampel, andre buťi prekal o kraľišagos, so pes kerel pal calo svetos.

• Pre soste hin škola prekal e prjekopňicko služba?

• Ko šaj džal andre škola prekal ola, so zvestinen pal o kraľišagos?