M’asɔɔ, elakanyelo w’akambo we teokrasi oyalakawɔ le Atemwe ye Yehova ngo te nkɔngɔlɔ l’ɛkɔmi. Walekɔ l’akalasa imɔtshi ye wɔlɔ dje ndakanyɛka anto wanayapɛyɛ wíná onkfumɔ ngo l’olemo we nsakola losango l’Onkfumi, dje wakoke ‘nsiyɛ olemo w’iwɔko wɔlɔwɔlɔ.’​—2 Timɔte 4:5.

Kalasa k’olemo we lowanga. Nde lowanga l’itshinda amonangha mvula otondo l’olemo we lowanga, wowetake dje nde ndjɛ y’ɔtshɔ kalasa k’etsho esamalo. Kalasa ɛkɔ nanghemaká mbala efula lá Mvulu k’Onkfumi ɛmɔtshi enapakɔ otale la nde. Kalasa ɛkɔ konakawɔ nde nkotshɛ lowanga dje nde malema Yehova wɔlɔ, ndjewa nangha olemo we nd’eko wɔlɔ l’akambo ankfumɔ, la nkindjɛ nangha olemo we nd’eko la gkɔmano.

Kalasa ke ansakodji we losango l’Onkfumi. Oyalakawɔ nde kalasa ke ngɔndɔ ipe dje nkotshɛ anto wanɛ wambekesaná wɔlɔ l’olemo we lowanga, la wakopá nyimɔ makawɔ dje ntshɔ t’etena ngo etena kokokawɔ ndjaatoma. Lá ndenda, otepelakawɔ solo nde amɔ: “Lenkɔnɛ! Ontome!” ngo te Yeso Kristo nyotepelá, nde loyalisá Nsakodji ke losango le wɔlɔ keleká anto ankfumɔ lá looko. (Izaya 6:8; Djɔanɛ 7:29) Nde ombawola ntshika mvulu k’ɛko dje ntshɔ ta mbandja y’otale ekoka nkɔlɔmba dje wɛ ndjawola ndjalá la lowiko lopa la gkete efula. Mbala imɔtshi onghɛna ente djalelo dj’anto, yane la ntshitshi, kondo toma te lá mbandja ikɔ itshikitana efula la lá mbandja y’inyoko. Mbala imɔtshi, olekɔ la dje ndjeka kondo otepela onkina. Kalasa ɛkɔ ekotshɛke akristo we mvula 23 tii 65, eyale endjemba w’ampame kondo we wamato, eyale koko akristo wanɛ wambotshukana, dje iwɔ mfudjɛ djalelo dje wɔlɔ dj’ase Kristo nakoka ndjaakotshɛ dje Yehova la olonghanyelo we nd’eko nkamba l’iwɔ efula.

Gileade, kalasa ke Bible ke Watchtower. L’otepela we Hebre, “Gileade” nsakiso ke nd’eko nde “Oloyi we Temwe.” Ma 1943 laye kalasa ke Gileade yowange, ambeki ndeka 8 000 wambosiyɛ́ kalasa ɛkɔ, la wambotomamá wamisionɛrɛ dje ntshɔ tɔpɛyɛ owakiɛ wopo we wɔlɔ efula “tii ta gkomo dje looko.” (Elemo 13:47) Lá wíná we wamisionɛrɛ yɔmɔ́ mbala ke ntondo lá Pérou, watatanela kondo otshumano ɔmɔ l’owila ɔkɔ. Lɔko ɛkɛnɛ, etshumano wemboyɛ́ ndeka 1 000. Lá wíná we wamisionɛrɛ yowange olemo lá Japon, Atemwe watayalaká kondo djomi l’owila ɔkɔ. Lɔko ɛkɛnɛ, wamboyɛ́ ndeka 200 000. Lá kalasa ke ngɔndɔ itano ke Gileade, ambeki wekake Bible, Otepela we Ndjambe, l’otondo. Anto wanetamaka ta kalasa ɛkɔ nde wanɛ wakambá olemo we lowanga l’ekekete, wamisionɛrɛ inapakambe lá Betele, anto wanɛ wakambá la wafiliale, kondo alami we ndjingandjinga, dje iwɔ nkfumbama efula ko ndjɛ yosikikadjɛ la nkembiɛ olemo l’andja w’otondo.

• Kalasa ke lowanga okɔpakawɔ nangha nke?

• Okoka ntshɔ ta Kalasa k’ansakodji w’Onkfumi na?