Ko te akoako faka-Tino Tālaki na kua leva te kave na ma he mea tāua a Molimau a Ieova. E i ei nā ākoga fakapitoa mo ki latou e foki atu tō latou taimi kātoa ki te galuega e tālaki te Mālō, ke mafai ke ‘fai latou galuega tālaki ke uma.’​—2 Timoteo 4:​5.

Ākoga Kaukaunaga Fakapaeonia. I te ikuga o tauhaga muamua o te kaukaunaga faka-taimi kātoa ko he paeonia tūmau, e tuhi ai tona igoa mo te akoga e ono aho hōvēia e fai i he Fale o Hauhinga e pili atu ki ei. Ko te fuafuaga, ke fehoahoani ki paeonia ke fakatafapili atu ki a Ieova, ma ke uigā i nā vaega uma o te galuega tālaki, ma tūmau pea ma te fakamāoni i te kaukaunaga.

Ākoga mo nā Tino Tālaki o te Mālō. Kua fai tēnei ākoga e lua mahina te loa ke koleni ai nā paeonia e i ei poto mahani e malilie ke tuku te nofoaga e nonofo ai ki latou ma olo ki hō he kogāfenua e manakomia ai ki latou. Ko tona uiga e lea vēia ki latou: ‘Ko au tēnei, ke uga atu au!’ e fakatakitaki ki latou ki a Iehu Keliho, ko te Tino Tālaki hili. (Ihaia 6:8; Ioane 7:29) Hōvē ko te hifi mamao mai tona kāiga e āfia ai te fakamahani ki he tulaga olaga e kehe. Hōvē e matuā kehe te aganuku, te tau, fakatahi ma nā meakai mai nā mea e mahani ai ia. Hōvēia e manakomia ke akoako he tahi gagana. Ko te ākoga tēnei e fehoahoani atu ki uho ma tuafafine e heki āvavaga ma nā ulugali fakaipoipo, e 23 ki te 65 o latou tauhaga, ke atiake nā uiga fakateagaga e manakomia i o latou tofiga ma te poto e mafai ke fakaaogā atili e ieova ma tona fakalāpotopotoga.

Ākoga Tuhi Paia o te Watchtower i Kiliata. Ko te uiga o te kupu Epelu, “Kiliata” ko te “Faupulega o Molimau.” Mai te fakavae o Kiliata i te 1943, e hilia te toka 8,000 nā tino na fakauku ma kavea ma mihonale kua uga atu ke molimau ki “te gataga o te lalolagi” ma matuā manumalo ai. (Galuega 13:47) I te taimi na fātoā pa atu nā ki Pelu, nae hēai ni fakapotopotoga i te atunuku tēnā. I te taimi nei kua hili atu i te 1,000. I te vaitiaimi na kamata oi kaukauna atu ai nā mihionale i Iapani, nae i lalo i te toka hefulu tahi o nā Molimau i te atunuku. Ko tēnei lā kua hilia atu i te toka 200,000. Ko te kōhi Kiliata e lima mahina te loa, e aofia he hukehukega māea o te Kupu o te Atua. Ko ki latou e kavea ma paeonia fakapitoa pe ko ni mihionale, ope e faigaluega i he ofiha o he lālā, pe e i te galuega tauhi malaga, e valakaulia ki latou ki te ākoga tēnei mo ni koleniga lahi ke fehoahoani ke fakamalohi ma manuia ai te galuega i te lalolagi kātoa.

• He ā te hini o te Ākoga Kaukaunga Fakapaeonia?

• Pe kua fai mo ai te Ākoga mo nā Tino Tālaki o te Mālō?