Bakamboni baJehova bazibidwe alwiiyo lweendelezegwaa Leza ndubajana. Lwiiyo oolu luyandikana lupegwa aabo balipedelede kumulimu wabo waciindi coonse wakukambawuka Bwaami, nkukuti bakonzye ‘kuzuzikizya cakumaninina mulimu wabo.’​—2 Timoteo 4:5.

Cikolo caMulimu wabuPayona. Kumamanino aamunyaka wamulimu waciindi coonse wakupayona, payona waciindi coonse ulanjila cikolo citola mazuba aali musanu abumwi, cicitilwa kuNa’nda yaBwaami. Makanze aacikolo eeci ngakugwasya mapayona kuswena aafwiifwi aJehova, babe basungweete mumilimu wabo wakukambawuka, alimwi akuti bayinkilile kunembo kababeleka cakusyomeka.

Cikolo caBakambawusi baBwaami. Cikolo eeci citola myeezi iibili, cakabambilwa kuyiisya mapayona balaaluzibo bakalibambila kusiya nkubazwa akuya kukubelekela kubulide basikupupulula makani mabotu. Baamba kuti, “Mpendi! Unditume mebo!” kabatobelezya Mukambawusi mupati wakabeleka aanyika, Jesu Kristu. (Isaya 6:8; Johane 7:29) Ikuya kule ankubazwa kuswaanizya kupona buumi buuba-uba. Ziyanza, bwiime bwakunze, alimwi azyakulya zilakonzya kusiyana akuli nzibakazibide. Kulayandikana alubo kwiiya mulaka mupya. Cikolo eeci cigwasya bakwesu abacizi bakwetene abatanakwatwa naa kukwata balaaminyaka iitalikila ku23 kusika ku65, ikuti basakwide bube bwakumuuya abusongo bwakubeleka buyandikana mumulimu wabo nibabelesegwa aJehova mumbunga yakwe.

Cikolo Citegwa Watchtower Bible School of Gilead. MuciHebrayo ibbala litii “Gilead” lyaamba “Bukamboni Bwiingi.” Kuzwa nicakatalika cikolo eeci mu 1943, mamishinali ibayiinda ku8 000 bakatumizigwa kunyika zyoonse nibakamanisya cikolo eeci kuti bakape bukamboni “kusikila kumamanino aanyika” alimwi bakazwidilila kapati. (Incito 13:47) Mucitondeezyo, mamishinali nibakasika ku Peru ciindi cakusaanguna, teekwakali mbungaano pe mucisi eeci. Pesi kwalino kwakaba mbungaano zyiinda ku1 000. Mamishinali nibakatalika kubelekela kuJapan, kwakali Bakamboni batasiki kukkumi mucisi eeci. Pesi kwalino kuli Bakamboni bayiinda ku200 000. Cikolo eeci citola myeezi iili musanu, ciswaanizya kwiiya Jwi lyaLeza cabusungu. Aabo babeleka kabali mapayona aayandikana naa mamishinali aabeleka mulimu wakukambawuka naa balikuma wofesi aamitabi, nikuba bali mumulimu walubazu balatambwa kucikolo eeci kutegwa bakayiisigwe kugwasizya, akusimya mulimu wakukambawuka uucitwa munyika yoonse.

• Cikolo caMulimu wabuPayona cijisi makanzee nzi?

• Cikolo caBakambawusi baBwaami cakapangilwa bani?