Kuruga kara, Yahwe aikaire n’atendeka abaheereza be. Haroho amasomero agateirweho kutendeka abo abahaireyo kutebeza amakuru amarungi nukwo basobole ‘kuhikiriza kurungi obuheereza bwabu.’—2 Timoseo 4:5, NW.

Isomero ry’Aba Payoniya. Payoniya ow’akasumi koona obwahikya omwaka gumu, aralizibwa kugenda omu isomero ry’aba payoniya ery’ebiro mukaaga ha Kingdom Hall ey’eba ekomerwemu. Ekigendererwa ky’isomero linu kiri kukonyera aba payoniya kwirra haihi na Yahwe, n’okukurakurana omu kutebeza amakuru amarungi. Kandi libakonyera kweyongera kuheereza n’obwesigwa.

Isomero ry’Abatebezi b’Obukama. Isomero linu limara ameezi abiri kandi likatekwaho kukonyera aba payoniya abetegekere kuheereza nambere hali obwetaago. Omu mulingo gunu, baba nibagamba, “Nyowe ndi hanu, tuma nyowe.” Kandi baba nibahondera ekyokurorraho kya Yesu Kristo omutebezi arukukirayo. (Isaya 6:8; Yohana 7:29) Kuruga omu kiikaro kyabu nikisobora kutwalizamu kwerekesa ebintu ebimu. Obuhangwa, enyikara y’obwire, n’eby’okulya nibisobora kuba nibyahukanira kimu n’ebibamanyiriire. Nikisobora n’okwetaagisa kwega orulimi rundi. Isomero linu likonyera abaswerangaine n’abatali omu buswere abanyakuli hagati y’emyaka 23 na 65 okukurakuraniza emiringo ey’eby’omwoyo ey’erukwetaagisa kurora bakozesebwa Yahwe n’ekitebe kye omu bwijwire.

Isomero lya Gireadi. Omu Ruheburaniya, ekigambo “Gireadi” kimanyisa “Omutuumo gw’Obwa Kaiso.” Kuruga Gireadi etandika omu mwaka 1943, abeegi 8,000 nubo batendekerwe omu isomero linu kandi basindikwa nk’aba misaani okuha obwa kaiso “okuhika ha mpero zensi”, kandi bakonyire muno. (Engeso Ezabakwenda 13:47) Aba misani obu basindikirwe omu ihanga lya Peru omurundi gw’okubanza, hakaba hataliyo kitebe kyona. Baitu hati, haliyo ebitebe ebirukukira omu 1,000. Aba misani obu basindikirwe omu Japan, Abakaiso ba Yahwe omu ihanga eri bakaba batarukuhika ikumi. Baitu hati, haliyo Abakaiso ba Yahwe abarukuhingura omu 200,000. Ameezi ataano ganu bagamara nibegesebwa Baibuli kugyetegerereza ha rulengo rwa ha iguru muno. Aba payoniya ab’embaganiza, abamisani abatakagendaga omw’isomero linu, ababeseeri, rundi abaroleerezi b’ebicweka baralizibwa omu isomero linu kutendekebwa nk’oku barukusobora kusagika n’okugumya omulimo gw’okutebeza amakuru amarungi omu nsi yoona.

• Isomero ly’Aba Payoniya liine kigendererwa ki?

• Isomero ly’Abatebezi b’Obukama liteirweho kukonyera baha?