O krire rẹ Iseri ri Jihova vwọ vwẹ ẹro ọghanghanre vwo nẹ isukuru re de yono Baibol na. Isikuru oghẹresan herọ vwọ kẹ ihwo ri phi ọke rayen phiyotọ vwọkẹ aghwoghwo rẹ Uvie na rere ayen se vwo “gbe odibo [rayen] gba.”​—2 Timoti 4:5.

Isikuru rẹ Ekobaro. Ohwo de ruiruo rẹ ọkobaro te ẹgbukpe ọvo re, kẹ e durhie kpẹ isikuru nana ra vwẹ ẹdẹ esan vwo ruẹ vwẹ Ọguan Ruvie rọ kẹrerẹ. A vwẹ isikuru nana vwo mu rere ọ vwọ vwẹ ukẹcha kẹ ekobaro vwo sikẹrẹ Jihova phiyọ, tẹn ona rẹ aghwoghwo, je fuevun vwẹ ẹga rayen.

Isikuru rẹ Ihwo ri Ghwoghwo Uvie Na. Ekobaro rẹ awọ rayen ghwotọ re, ri ji vwo owenvwe rẹ ayen vwo kpẹ asan ra da ma guọnọ ukẹcha, yin kpẹ isikuru nana rọ reyọ emeranvwe ivẹ na. Vwo nene udje rẹ Oghwoghwota rọ ma rho, Jesu Kristi, kọ ghwa họhọ nẹ ayen ta: “Mẹvwẹ na! Ji vwe!” (Aizaya 6:8; Jọn 7:29) Ọ guọnọ ewene, ayen sa vwọ dia asan ọrhorha. Ẹkuruemu, aruọke vẹ oka rẹ emu rẹ ihwo na ria sa fẹnẹ. Ọkiọvo dede, iniọvo na se yono ejajẹ ọfa. Isikuru nana vwẹ ukẹcha kẹ iniọvo eshare vẹ eya, rehẹ uvwre rẹ ikpe 23 fiẹ 65, te e re rọvwọnre vẹ e re je rọvwọ-ọn, vwo vwo uruemu ro fo kẹ Inene-ri-Kristi kugbe ena rẹ ayen guọnọre, rere ukoko ri Jihova sa vwọ vwẹ ayen vwo ruiruo vọnvọn.

Isikuru ri Gilead. Vwẹ ejajẹ ri Hibru, ota na “Gilead” mudiaphiyọ “Ekrun ro Soseri.” Rhavwẹn ọke rẹ isikuru ri Gilead na vwọ tonphiyọ vwẹ ukpe ri 1943, ihwo ri wontọ nẹ isikuru na re ji kpẹ ẹkuotọ efa kerẹ imishọnare bun vrẹ 8,000; ayen soseri ro fiotọ re te “oba rẹ akpọ na.” (Iruo 13:47) Ọke rẹsosuọ re vwo ji ihwo ri wontọ nẹ isikuru na kpẹ Peru, ukoko vuọvo hẹ ẹkuotọ na-a. Asaọkiephana, ikoko re herọ bun vrẹ 1,000. Imishọnare avwanre vwọ ton iruo aghwoghwo phiyọ vwẹ Japan, Iseri ri Jihova re herọ te ihwe-e. Enẹna, ayen vrẹ 200,000 shesheri. A nabọ yono Baibol na fiotọ vwẹ isikuru ri Gilead ra vwẹ emeranvwe iyorin vwo ruẹ. Iniọvo re ga kerẹ ekobaro oghẹresan, imishọnare, e re wian vwẹ oghọn ukoko, yẹrẹ e rehẹ iruo okinriariẹ, yen e durhie kpẹ isikuru nana rọ nẹrhẹ iruo aghwoghwo rẹ akpọeje na sa yan obaro.

• Die yen nẹrhẹ a vwẹ Isikuru rẹ Ekobaro na vwo mu?

• Amono yen a rhuẹrẹ Isikuru rẹ Ihwo ri Ghwoghwo Uvie na kẹ?